पूर्वाञ्चल खबर
नयाँ मूल्यसूची अनुसार डिजल र मट्टीतेलमा प्रतिलिटर ३० रुपियाँ र हवाई इन्धमा प्रतिलिटर पाँच रुपियाँले वृद्धि गरिएको छ । नयाँ निर्धारित मूल्यअनुसार, डिजल र मट्टीतेलको प्रतिलिटर दुईसय ३७ पुगेको छ । हवाई इन्धनको मूल्य प्रतिलिटर दुईसय ५६ रुपियाँ पुगेको छ । यो मूल्यवृद्धिसँगै नेपालमा पेट्रोल भन्दा डिजेल र मट्टितेल महंगो भएको छ ।
अन्तर्राष्ट्रिय बजारमा मूल्यवृद्धि भएको र इण्डियन आयल कर्पोरेशनले पठाएको नयाँ मूल्य सूचीअनुसार हिसाब गर्दा अझै अत्यधिक घाटा रहेको निगमको दाबी छ । लागत मूल्य बढी र बिक्री मूल्य कम भएकाले मूल्य समायोजन गर्दा समेत पेट्रोलमा प्रतिलिटर दुई रुपियाँ ३२ पैसा, डिजलमा प्रतिलिटर ८७ रुपियाँ ९९ पैसा, मट्टीतेलमा ३६ रुपियाँ ७० पैसा र खाना पकाउने एलपी ग्यासमा प्रतिसिलिण्डर तीनसय ३१ रुपियाँ २५ पैसा घाटा रहेको निगमले जनाएको छ ।
पाक्षिक रूपमा करिब सात अर्ब ८१ करोड ६१ लाख रुपियाँ बराबरको घाटा रहेको निगमले जारी गरेको विज्ञप्तिमा उल्लेख छ ।
