पूर्वाञ्चल खबर
विराटनगर/ अवैध हुण्डीको कारोबार गर्ने विराटनगर– ७ स्थित आस्था नेपाल बहुउद्देश्य सहकारी संस्थाका अध्यक्ष राजेश हेडासहित तीनलाई प्रहरीले पक्राउ गरेको छ ।
प्रहरीले सहकारीका व्यवस्थापक विराटनगर १२ दिपककुमार कर्ण र विराटनगर ११ का सुमित साहलाई आज दिउँसो विराटनगरबाट पक्राउ गरेको हो ।
मोरङ प्रहरी प्रवक्त्ता डिएसपी धनश्याम श्रेष्ठले स्रोत नखुलेको अवैध ६९ लाख ५७ हजार ६ सय रुपैयाँ सहित सहकारी सस्थाका पदाधिकारी र कर्मचारीहरुलाई पक्राउ गरेको बताए ।
पक्राउ परेका मध्ये हुण्डीको कारोबार गर्ने मुख्य व्यक्ति राजेश रहेको र उनले कहाँ कहाँ र क कस्लाई रकम पठाउने गरेका थिए अनुसन्धान भैरहेको प्रहरीले जनाएको छ ।
पहिले विराटनगरमा विभिन्न पसल, घर र सटही काउण्टरहरु मार्फत हुण्डिको कारोवार हुदै आएको थियो । लामो समयदेखि चल्दै आएको हुण्डिको कारोवारलाई दुई बर्षअघिदेखि मोरङ प्रहरीले निरन्तर भत्काउदै आएको थियो । प्रहरीले हुण्डि कारोवारमा कडा निगरानी राख्न थालेपछि अबैध कारोवारीहरुले सहकारी सँस्थाहरुलाई प्रयोग गर्न थालेको प्रहरीको बुझाई छ । मोरङका एसपी मनोज केसीले भने, ‘हुण्डिको सञ्जाल ध्वस्त भएपछि कानूनबाट जोगिन विभिन्न विकल्पहरु खोज्न थालेको पाइयो त्यसैको एउटा उदाहरण सहकारी पनि प्रयोग भएको फेला परेको हो ।’
