विराटनगरको शिक्षादीप कलेजमा ‘कृत्रिम बुद्धिमत्ता, डिजिटल युग, सामाजिक सञ्जाल तथा विज्ञान–प्रविधिको अवधारणामा कविता प्रतियोगिता

कलेज परिसरमा आयोजित प्रतियोगितामा कक्षा ११ र १२ विज्ञान संकायका ८५ विद्यार्थी सहभागी थिए । प्रतियोगितामा अर्पिता न्यौपाने प्रथम भएकी छन् । रिजु अधिकारी र विभूति बिष्ट द्वितीय, प्रिया दर्नाल र सन्ध्या धमला तृतीय भएका छन् । त्यस्तै केशव झा, खान्सा तनविर र सहिष्णुता बरालले सान्त्वना पुरस्कार प्राप्त गरेका छन् ।

प्रतियोगिताको निर्णायकमा साहित्यकार चुडामणि नेपाल ‘अकिञ्चन’, मिनकुमार ‘नवोदित’ र विमल किशोर श्रीवास्तव रहेका थिए ।

कलेजका प्रिन्सिपल ज्ञानबहादुर खड्काले प्रतियोगिताको उद्घाटन गरेका थिए । कार्यक्रममा उनले साहित्य समाजलाई मार्गनिर्देशन गर्ने विधा भएको बताए ।
विद्यार्थीमा लुकेको प्रतिभा उजागर गर्ने उद्देश्यले कलेजले वार्षिक क्यालेण्डेर बनाएर विभिन्न अतिरिक्त क्रियाकलाप तथा प्रतियोगिता आयोजना गर्दै आएको उनले बताए । उनका अनुसार कलेजले यसअघि पनि विद्यार्थीको प्रतिभा प्रस्फुटनका लागि विभिन्न प्रतियोगिता आयोजना गर्दै आएको छ ।

प्रतियोगिताले साहित्यलाई समसामयिक प्रविधिसँग जोड्दै विद्यार्थीलाई आधुनिक समाजका परिवर्तनलाई कलात्मक ढंगले बुझ्ने र आफ्ना धारणा प्रस्तुत गर्ने अवसर दिएको प्रिन्सिपल खड्काको भनाइ थियो । पछिल्लो समय कृत्रिम बुद्धिमत्ता र डिजिटल माध्यमको प्रयोग तीव्र भइरहेका बेला विद्यार्थीले यस्ता विषयलाई साहित्यिक सिर्जनामार्फत उठाउनुलाई सिर्जनात्मक शिक्षाको अभ्यासका रूपमा समेत हेरिएको छ ।