पूर्वाञ्चल खबर
कोशी अस्पतालको आकस्मिक कक्ष माथिको भवनमा आज एक कार्यक्रमको आयोजना गरी बन्द भएको लामो समयपछि पाँच शैय्याको एनआइसियू सुचारु गरेको हो ।
एनआइसियू सेवा कोशीमा बन्द रहदा सर्वसाधरणले चर्को शुल्क लिएर निजी हस्पिटल जान बाध्य रहेका थिए । ठाउँ अभाव र दक्ष जनशक्ति नभएको देखाउँदै कोशी अस्पताल प्रशासनले दुई वर्ष अगाडीदेखि एनआइसियूको उपकरणहरू स्टोरमा थन्काएर सेवा ठप्प पारेको थियो । अब एनआइसियू सेवा सुचारु भएपछि विरामीलाई सहजता भएको कोशी अस्पतालको मेसु डा. रविराज सिंहले बताए । थप जनशक्ति व्यवस्थापनमा ध्यान दिएर अगाडी बढने उनले बताए । ‘अहिले पनि जनशक्ति अभाव रहेको छ । विकास समितिबाट थप व्यवस्थापन गरेर एनआइसियूलाई व्यवस्थित गरेर अगाडी लैजानेछौं,’ उनले भने ।
अस्पतालको पेडयाडिक वार्ड ३२ बेडको संचालनमा रहेको छ । अहिले संचालन गरेको एनआइसियूमा मेडिकल अपिसर र स्पाट नर्स अभाव रहेको कोशी अस्पतालका बच्चा विभागका प्रमुख डा. रामनारायण चौधरीले बताए । बालरोग विशेषज्ञ चिकित्सक कोशीमा आठ जना रहेको छन् । तर, मेडिकल अपिसर र नर्सको संख्या न्यून रहेको छ । ‘एनआइसियूमा एउटा भेन्टिलेसनमा एक जना नर्सको आवश्यक पर्दछ । तर, अहिले पनि बच्चा वार्डबाट नर्स ल्याएर काम चलाएको छ,’ उनले भने, ‘भेन्टिलेसन चलाउन मेडिकल अपिसर कम्तीमा पनि तीन जना आवश्यक पर्दछ । त्यसको व्यवस्थापन अस्पतालले गर्नुपर्दछ ।’
अस्पतालमा एनआइसियू सुचारु भएपनि भेन्टिलेसन चलाउने जनशक्तिको अभाव रहेको अस्पताल स्रोतको भनाई छ । ‘भेन्टिलेसनमा राखिएको नवजात शिशुलाई २४ घण्टा कियर आवश्यक पर्दछ । अस्पतालमा प्रयाप्तमा मात्रमा बच्चाको विशेषज्ञ चिकित्सक भएपनि मेडिकल अपिसर र नर्सको चरम अभाव रहेको छ । अस्पताल प्रशासनमा जनशक्ति व्यवस्थापनमा तत्काल ध्यान दिन जरुरी रहेको छ,’ एक जना चिकित्सकले भने, ‘अहिले एसएनसियू (स्पेशल न्यु वन केयर युनिट’ मात्रै संचालनमा आएको हो ।’
