पूर्वाञ्चल खबर
विराटनगर /मोरङ क्षेत्र नं. ६ का एमाले उम्मेदवार विनोद ढकालको अन्तिम चुनावी सभा भव्य रुपमा सम्पन्न भएको छ । चुनावी सभामा हजारौंको सहभागिता रहेको थियो ।
विराटनगर महानगरपालिका कार्यालय अघिको सडकबाट र्याली सहित शुरु भएको अन्तिम चुनावी सभा महेन्द्र चोकमा पुगेर कोणसभा गरि सम्पन्न भएको हो ।चुनावी सभामा एमाले उपमहासचिव योगेश भट्टराई, पूर्व उपाध्यक्ष गुरु बराल, पूर्व स्थायी कमिटी सदस्य तथा पूर्व मन्त्री लालबाबु पण्डित, केन्द्रीय सदस्य पर्शुराम बस्नेत लगायतका नेता कार्यकर्ताहरु सहभागी भएका थिए ।
चुनावी सभालाई संवोधन गर्दै उपमहासचिव भट्टराईले विराटनगरको शाख फर्काउने कामको नेतृत्व विनोद ढकालले मात्र गर्न सक्ने बताए। विराटनगरलाई अन्र्तराष्ट्रिय स्तर सम्म चिनाउन र यहाँका बासीन्दाको आत्मसम्मान बढाउने काम एमाले नेता ढकालले मात्रै गर्न सक्ने उनको भनाई छ । विराटनगरले ढकाल जस्तो योग्य र प्रतिभाशाली प्रतिनिधि खोजिरहेको उपमहासचिव भट्टराईले बताए ।
एमाले मोरङ क्षेत्र नं. ६ को अन्तिम चुनावीसभालाई विराटनगरमा संवोधन गर्दै उपमहासचिव भट्टराइले एमाले उम्मेदवार ढकाललाई जिताउन क्षेत्रवासीमा आग्रह समेत गरे ।
