खबर पूर्वाञ्चल
दिक्तेल—खानीडाँडा—रेग्मीटार सडकमा पर्ने दिखुवा खोलामा बन्ने पुलका आज कोशी प्रदेशका भौतिक पूर्वाधार विकास मन्त्री भुपेन्द्र राईले शिलन्याश गरे ।
दिक्तेल रुपाकोट मझुवागढी नगरपालिका—४ खाल्ले र १५ विजयखर्कको सिमानामा अवस्थित दिखुवा खोलामा मोटरेबल पुल नहुँदा बर्खामा सवारी साधान आवतजावतमा समस्या थियो । प्रदेश सडक पुल सहयोग इकाई ईटहरी र भौतिक पूर्वाधार विकास मन्त्रालय अन्तरगत पूर्वाधार विकास कार्यालय गाइघाटको साझेदारीमा मोटरेबल पुल बन्न लागेको हो ।
पुल निर्माणको लागि करिब ५ करोड ५० लाख लाग्ने भौतिक पूर्वाधार मन्त्रालयको अनुमान छ । ट्रष्ट ब्रिज निर्माणका लागि आवश्यक स्टिल ट्रष्ट प्रदेश सडक पुल सहयोग इकाई ईटहरीले उपलब्ध गराउने छ । उक्त पुलका लागि करिब २ करोड बढीको स्टिल ट्रष्ट तयार पारिसकिएको प्रदेश सडक पुल सहयोग इकाई ईटहरीका प्रमुख सुर्य नारायण चौधरीले बताए ।
शिलान्यासको दिन आजनै केही स्टिल ट्रष्ट पुल निर्माण स्थलमा पुर्याएको छ । बाँकी क्रमशः ल्याउने प्रमुख चौधरीको भनाइ छ ।
कालोपत्रको काम भइसकेको दिक्तेल—महुरे २० किलोमिटर र कालोपत्रको काम भइरहेको महुरे—राजापानी—रेग्मीटार सडक २९ किलोमिटरगरी दिक्तेल—रेग्मीटार सडक ५९ किलोमिटर लामो छ । निर्माणाधीन दिक्तेल—खानीडाँडा—आहाले—रेग्मीटार सडक दिक्तेल—महुरे—राजापानी—रेग्मीटार सडकभन्दा साढे १७ किलोमिटर छोटो छ ।
दिखुवा खोलामा मोटरेबल पुल निर्माण सम्पन्न भएर दिक्तेल—खानीडाँडा—रेग्मीटार सडकमा नियमित यातायात सञ्चालन भएमा जिल्लामा खाद्यान्न, हार्डवेयर, इन्धनलगायत दैनिक उपभोग्यवस्तु ढुवानीमा सहज हुने स्थानीय व्यवसायी बताउँछन् ।
