विराटनगर / विराटनगरस्थित हिमालय टाकिज प्रालिले ४२ लाख रुपैयाँ भन्दा बढी विराटनगर महानगरपालिकालाई कर तिर्नुपर्ने कर बुझाउन आलटाल गर्दै आएको छ ।
महानगरपालिकाले दिएको समयसीमाभित्र कर बुझाउन हिमालय टाकिजले आलटाल गर्दै आएको महानगरले जनाएको छ ।महानगरपालिकाले सुरुमा दिएको समयसीमा भित्रमा हलले कर वापतको बक्यौता नबुझाएपछि थप समय दिएको छ । यसअघि दिएको समयभित्र हिमालय टाकिजले बक्यौता रकम नदिएपछि महानगरपालिकाले बुधबार विहान ७ बजेसम्मको समय दिएको छ ।
यसअघि राजस्व महाशाखाको नेतृत्वमा गएको अनुगमन समितिले शुक्रबारसम्म कर तिनुपर्ने र नतिरे हलमा तालाबन्दी गर्ने चेतवनी दिएको थियो । सिनेमा हलले शुक्रबारसम्म कर नबुझाएपछि आज तालाबन्दी गर्न महानगरपालिकाको टोली गएको थियो । बुधबारसम्म कर बुझाउने समयसीमा मागेपछि अन्तिम पटक समय दिएको महानगरपालिकाको राजस्व महाशाखा प्रमुख सरोज गौतमलले जानकारी दिए । बुधबारसम्म हिमालय सिनेमा हलले बुझाउनुपर्ने कर वापतको रकम नबुझाए तालाबन्दी गरिने महानगरले जनाएको छ । ‘हामी बुधबारसम्म हेर्नछौं, हल सञ्चालकले भनेको समयभित्र महानगरपालिकालाई कर नबुझाए बाध्य भएर तालाबन्दी गर्नेछौं,’ उनले भने, ‘बुधबार त्यो यो बहाना हामी सुन्ने छैनौं ।’हिमालय टाकिज प्रालिले महानगरपालिकालाई मनोरञ्जन, व्यवसायी र सम्पती कर गरी ४२ लाख भन्दा बढी तिर्न बाँकी छ । उसले ३२ लाख रुपैयाँ सम्पती कर तथा मनोरञ्जन र व्यवसायिक कर १० लाख रुपैयाँ तिर्न बाँकी रहेको राजस्व महाशाखा प्रमुख गौतमलले जानकारी दिए ।
सिनेमा हलले बिक्री भएको टिकटको मनोरञ्जन कर वापत ३ प्रतिशत कर महानगरपालिकालाई बुझाउनुपर्ने कानूनी व्यवस्था छ । तर, हिमालय हलले अहिलेसम्म कर बुझाएको छैन । विराटनगरमा रहेको भाटभाटेनीको क्यिूएफएक्स, सिटी सिनेमा, अरुण सिनेमा हललगतयाले पनि मनोरञ्जन कर नतिरेको पाइएको छ ।
विद्यार्थीबाट चर्को शुल्क लिने विराटनगरस्थित दिल्ली पब्लिक स्कुल डिपिएसको नाममा रहेको जग्गा, भवनलगायत अन्य भौतिक सम्पत्तिबापत महानगरले ३५ लाख रुपैयाँ राजश्व प्राप्त गर्नुपर्ने देखिएको छ । महानगरपालिकाले पटक–पटक ताकेता गर्दा पनि डिपिएसले जग्गा, भवनलगायतका अन्य भौतिक सम्पत्तिबापतका कर तिर्न चासो देखाएको छैन ।
महानगरलाई व्यवसाय कर र सम्पत्ति कर नतिर्नेमा विराटनगरको व्यावसायिक समूह आरके सेन्टर मल पनि छ । आरके मलबाट २८ लाख रुपैयाँ राजश्व प्राप्त गर्न बाँकी रहेको महानगरपालिकाले जनाएको छ ।
तपाईको प्रतिक्रिया