पाकिस्तानलाई स्तब्ध पार्दै अष्ट्रेलिया फाइनलमा

खबर पूर्वाञ्चल, २६ कार्तिक २०७८, शुक्रबार ०८:५१

विराटनगर । यूएईमा जारी आईसीसी टी–२० विश्वकपमा उपाधिको दावेदार मानिएको पाकिस्तानलाई पराजित गर्दै अष्ट्रेलिया फाइनलमा प्रवेश छ ।

ब उसले उपाधिका लागि छिमेकी राष्ट्र न्यूजिल्याण्डसँग आइतबार प्रतिस्पर्धा गर्ने छ ।

अष्ट्रेलिया बिहीबार राति दुबईमा भएको दोस्रो सेमिफाइनल खेलमा पाकिस्तानको चुनौतिलाई ५ विकेट पन्छाउँदै उपाधि नजिक पुगेको हो ।

पाकिस्तानले दिएको १ सय ७७ रनको लक्ष्य अष्ट्रेलियाले १९ ओभरमा ५ विकेट गुमाएर सो लक्ष भेट्टाएको थियो । उसका लागि म्याथ्यु वेड, मार्कस स्टोइनिस र डेभिड वार्नरले शादार ब्याटिङ गरे । ९६ रन बनाउँदा ५ विकेट गुमाएको अष्ट्रेलियालाई ४८ बलमा ८१ रन चाहिएको थियो ।

उत्कृष्ट पारी खेलेका म्याथु वेड र मार्कस स्टोइनिसले छैटौं विकेटका लागि अविजित ८१ रनको साझेदारी गरे । त्यसमा पनि निर्णायक १९औं ओभर रह्यो । शाहिन शाह अफ्रिदीले बलिङ गरेको त्यो ओभरको तेस्रो बलमा वेडले जीवनदान पाएका थिए । लगतै चौथो, पाँचौं र छैटौं बलमा लगातार तीन छक्का हान्दै उनले टिमलाई जित दिलाए ।वेड ४१ रन र स्टोइनिस ४० रनमा अविजित रहे । डेभिड वार्नरले ४९ रन बनाए । वेडले १७ बलमा ४ चौका र २ छक्का प्रहार गरे ।

पाकिस्तानका लागि शादाब खानले उत्कृष्ट बलिङ गरे । उनले ४ ओभरमा २६ रन खर्चिएर महत्वपूर्ण ४ विकेट लिँदा शाहीन शाह अफ्रिदीले १ विकेट हात पारे ।

यसअघि टस हारेर पहिले ब्याटिङ गरेको पाकिस्तानले निर्धारित पुरै ओभर खेल्दै ४ विकेट गुमाएर १ सय ७६ रन बनाएको थियो । उसका लागि मोहम्मद रिजवान र फखर जमानलेले अर्धशतकीय पारी खेले । रिजवानले ५२ बलमा ३ चौका र ४ छक्कासहित सर्वाधिक ६७ रन बनाउँदा फखरले ३२ बलमा ४ छक्का र ३ चौकाको मद्दतमा अविजित ५५ रन जोडे ।

यस्तै, कप्तान बाबर आजमले ३९ रनको योगदान दिँदा शोएब मलिक १ र आसिफ अली शून्य रनमा आउट भए । मोहम्मद हफिज १ रनमा नटआउट रहे ।

अष्ट्रेलियाका मिचेल स्टार्कले २ विकेट तथा एडम जम्पा र प्याट कमिन्सले १–१ विकेट लिए । पाकिस्तान समूह २ को विजेता र अष्ट्रेलिया समुह १ को उपविजेता बन्दै सेमिफाइनलमा पुगेको थियो ।

जारी प्रतियोगितामा उत्कृष्ट प्रदर्शन गरेको पाकिस्तान सेमिफाइनलमा हार बेहोर्दै बाहिरिएको छ ।

यो खबर पढेर तपाईलाई कस्तो महसुस भयो ?

तपाईको प्रतिक्रिया

*

खबर पूर्वाञ्चल

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक:
पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: pushpa.biratnagar@gmail.com
सम्पादक – डिल्ली पोखरेल, ९८५२०२२३९२
सुचना तथा प्रसारण विभाग दर्ता नं. ०७५७/०७४/७५