मोरङमा कोरोनासङ्क्रमणबाट थप ११ जना संक्रमितको मृत्यु

मोरङका विभन्न अस्पतालमा १० जनाको उपचारका क्रममा र एक जनाको होम आइसोलेसनमा मृत्यु भएको हो । मृत्यु हुनेमा सात पुरुष र चार महिला रहेका छन् । मृतकमध्ये २२ देखि ५० वर्षसम्मका चार जना छन् ।

विराटनगरको नोबेल शिक्षण अस्पतालमा ४, कोशी अस्पताल कोभिड उपचार युनिट, कोसी अस्पताल कोभिड–१९ उपचार केन्द्र र मोरङको बूढीगङ्गा गाउँपालिकास्थित विराट शिक्षण अस्पतालमा २÷२ जना सङ्क्रमितको ज्यान गएको छ ।

नोबेल अस्पतालमा सुनसरीको दुहवी नगरपालिका–३ का २२ वर्षीय युवकको आज बिहान ६ः४५ बजेतिर मृत्यु भएको छ । नोबेल शिक्षण अस्पतालका प्रबन्धक नारायण दाहालका अनुसार युवकलाई उपचारका लागि जेठ ७ गते अस्पताल भर्ना गरिएको थियो ।

सुनसरीको इटहरी उमपहानगरपालिका–२० की ३९ वर्षीय महिलाको आजै विहान ६ बजेतिर नोबेलमै मृत्यु भएको छ । उनलाई उपचारका लागि जेठ ११ गते भर्ना गरिएको थियो ।

दाहालका अनुसार सिरहाको धनगढी नगरपालिका–१० का ७० वर्षीय वृद्ध पुरुषको विहानका राति १ बजेतिर मृत्यु भएको छ । उनलाई वैशाख २५ गते उपचारका लागि भर्ना गरिएको प्रबन्धक दाहालले बताए ।

उनका अनुसार मोरङको सुनवर्षी नगरपालिका–४ का ५८ वर्षीय पुरुषको विहानका राति १२ः३० बजेतिर मृत्यु भएको छ । कोरोना पुष्टि भएपछि उनलाई उपचारका लागि जेठ १२ गते अस्पताल भर्ना गरिएको जानकारी दाहालले दिए ।

कोशी अस्पताल कोभिड उपचार युनिटमा विराटनगर महानगरपालिका–६ की ४० वर्षीय महिलाको मृत्यु भएको छ । उपचारका लागि शुक्रबार भर्ना गरिएकी महिलाको आज विहान ९ः१५ बजेतिर मृत्यु भएको अस्पतालका मेडिकल सुपरिटेन्डेन्ट डा. चुमनलाल दासले जानकारी दिए ।

उनका अनुुसार सिरहाको कल्याणपुर–७ का ५९ वर्षीय पुरुषको शुक्रबार राति ८ः४० बजेतिर मृत्यु भएको छ । उनलाई उपचारका लागि जेठ १ गते अस्पताल भर्ना गरिएको थियो ।

कोशी अस्पताल कोभिड–१९ उपचार केन्द्रमा विराटनगर–१४ की ५० वर्षीय महिलाको विहानका राति ३ः४५ बजेतिर मृत्यु भएको छ । केन्द्रका सूचना अधिकारी अनुपम राजवंशीका अनुसार सङ्क्रमित महिलालाई उपचारका लागि जेठ ६ गते ल्याइएको थियो ।

सुनसरीको बर्जु गाउँपालिका–२ का ६० वर्षीय पुरुषको पनि विहान ४ः१५ बजेतिर मृत्यु भएको राजवंशीले बताए । उनका अनुसार मृतक पुरुषलाई जेठ ५ गते उपचारका लागि भर्ना गरिएको थियो ।

विराट शिक्षण अस्पतालमा मोरङको बूढीगङ्गा गाउँपालिका–२ का ५५ वर्षीय पुरुषको विहानका राति २ः४५ बजेतिर मृत्यु भएको छ । विराटका कोभिड अस्पताल इन्चार्ज सुनील देवका अनुसार पुरुषलाई उपचारका लागि जेठ ८ गते भर्ना गरिएको थियो ।

उदयपुरको चौदण्डीगढी नगरपालिका–६ की ६५ वर्षीय वृद्धा महिलाको उपचारकै क्रममा विराटमा मृत्यु भएको छ । जेठ ७ गते भर्ना गरिएकी महिलाको राति ९ बजेतिर मृत्यु भएको जानकारी देवले दिए ।

मोरङको लेटाङ नगरपालिका–३ का ५२ वर्षीय पुरुषको होम आइसोलेसनमै मृत्यु भएको छ । पीसीआर परीक्षण गराउँदा उनलाई जेठ ९ गते कोरोना पुष्टि भएको थियो । कोरोना देखिए पनि घरमै आराम गरेर बसिरहेका पुरुषको एक्कासि स्वास्थ्यमा समस्या देखिएर शुक्रबार राति ९ः३० बजेतिर मृत्यु भएको जानकारी नगरपालिकाले दिएको छ ।