झापाका ६२ वर्षीय बृद्धमा कोरोना पुष्टि भएसँगै प्रदेश १ मा संक्रमितको संख्या ३० पुग्यो, देशभर ४९

खबर पूर्वाञ्चल, १२ बैशाख २०७७, शुक्रबार २२:४१

विराटनगर / प्रदेश १ को झापाका एक व्यक्तिमा आज कोरोना संक्रमण पुष्टि भएससँगै प्रदेश १ मा कोरोना संक्रमितको संख्या ३० पुगेको छ ।

पछिल्लो पटक झापाको दमकका ६२ वर्षीय बृद्धमा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । प्रदेश १ मा सबै भन्दा बढी उदयपुरमा २८ जनामा कोरोना संक्रमित भेटिएका थिए । उदयपुरमा देशमै सबै भन्दा बढी कोरोना संक्रमित भेटिएपछि प्रदेश १ मा यसको संक्रमण फैलिन सक्ने जोखिम समेत बढेको छ ।

उदयपुरको नूरी मस्जिदमा आएका जमातीहरुलाई कोरोनाको संक्रमण देखिएपछि उनीहरु घुमेको प्रदेश १ र प्रदेश २ का विभिन्न जिल्लाहरुमा सतर्कता बढाइएको छ ।

उदयुरको भुल्के हटस्पटको रुपमा रहदा पहाडी जिल्ला भोजपुर र तराईको जिल्ला झापामा पनि कोरोनाको संक्रमण भएको पुष्टि भएपछि भने थप सतर्कता अपनाउन जरुरी भएको विज्ञहरुले बताए ।

संक्रमितहरु भारतीय नागरिक १२ जना, उदयपुरका १३ जना, विराटनगरका ४ जना र झापाका १ जना छन् । संक्रमितमध्ये २८ जनाको विराटनगरमा उपचार भइरहेको छ । बिहीबार संक्रमण पुष्टि भएका भोजपुरका युवालाई पनि विराटनगर ल्याईदैछ । देशभर संक्रमितको संख्या ४९ पुगेको छ । उनीहरुमध्ये १० जना उपचारपछि घर फर्किएका छन् ।

दमकमा एकै परिवारका ३ जनामा र्यापिट टेष्ट गर्दा (आरडिटी) पोजेटिभ भेटिएको थियो । आरडिटी पोजेटिभ देखिएका ब्यक्तिका परिवारका एक सदस्य दुबईबाट आएको बताइएको छ । तर, उनको स्वाब परीक्षण गर्दा नेगेटिभ आएको छ ।

संक्रमितका छोरा ४ चैतमा दुबईबाट आएका थिए । विमानबाट काठमाडौं ओर्लिएका उनी बस चढेर घर पुगेका थिए । विदेशबाट आएकाहरुको परीक्षणका क्रममा उनीसँगै परिवारमा रहेका उनका आमा, बावु र श्रीमतीको टेष्ट गरिएको थियो । श्रीमती बाहेक सबैको पोजेटिभ आयो । त्यसपछि सबैको थ्रोट स्बाव संकलन गरेर धरानस्थित वीपी कोइराला स्वास्थ्य विज्ञान प्रतिष्ठानमा पठाइएको थियो ।

अरुको नेगेटिभ आयो तर, ६२ वर्षका बृद्धको रिपोर्ट पोजेटिभ आएको छ । उनी डाइबेटिजको विरामी भएको पाइएको छ ।

दमक ३ भुटानी शरणार्थी शिविर बेलडाँगी नजिकैको परिवारमा कोरोनाको एण्टीबडी देखिएपछि आजैदेखि शिविर आवतजावतमा प्रतिवन्ध लगाईएको छ । शरणार्थी शिविरमा बाक्लो बस्ती रहेकाले छिटो संक्रमण फैलन सक्ने भएकाले दमक नगरपालिकाको पहलमा तत्कालै शिविर शिल गरिएको नगर उपप्रमुख गिता अधिकारीले जानकारी दिए ।

कोरोना देखिएपछि दमकमा तरकारी बिक्री वितरणदेखि लिएर सबै ब्यापार ब्यवसाय बन्द गर्ने निर्णय भएको छ । दमक बाहिरबाट दुध, तरकारी र मासुजन्य सामाग्रि ल्याउन पनि बन्देज लगाईएको छ ।

यो खबर पढेर तपाईलाई कस्तो महसुस भयो ?

तपाईको प्रतिक्रिया

*

arniko
kantipur
pabson Brt
GREDED
siddharth
brithfutur
PABSON MORANG

खबर पूर्वाञ्चल

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक:
पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: pushpa.biratnagar@gmail.com
सम्पादक – डिल्ली पोखरेल, ९८५२०२२३९२
सुचना तथा प्रसारण विभाग दर्ता नं. ०७५७/०७४/७५