अन्तर कलेज फुटबल प्रतियोगिता विराटनगरमा शुरु

खबर पूर्वाञ्चल, २८ फाल्गुन २०७६, बुधबार २१:२४

विराटनगर /विराटनगरमा आजदेखि सुरु भएको २१ वर्षमुनिको अन्तर कलेज लिगकम नकआउट फुटबल प्रतियोगितामा रेडस्टार कलेजले विजयी सुरुवात गरेको छ ।

विराट बुद्ध स्पोर्ट्स क्लबले विराटनगरस्थित डिग्री कलेजको मैदानमा आयोजना गरेको प्रतियोगिताअन्तर्गत उद्घाटनका दिन भएको ग्रिनल्याण्ड र निहारिबीच बराबरी तथा रेडस्टार कलेज विजयी भएको छ ।

प्रतियोगिताको पहिलो खेलमा विराटनगरका ग्रिनल्याण्ड कलेज र निहारिका कलेजबीच भएको खेल गोलरहित बराबरी भएपछि दुवै टिमले समान १–१ अंक बाँडेका छन् । खेलको म्यान अफ द म्याच निहारिकाका झमक मगर भए ।

त्यस्तै दोस्रो खेलमा पथरीको रेडस्टार कलेजले विराटनगरको हिमालय दर्शन कलेजलाई ४–१ गोलमा पराजित गर्दै विजयी सुरुवात गरेको छ । रेडस्टारका लागि ९ औं मिनेटमा ओम राईले गोल गर्दै टिमलाई अग्रता दिलाए । ३२ औं मिनेट र खेलको अन्तिम समयमा नामसाङ लिम्बू र ४४ औं मिनेटमा विनायक लिम्बूले गोल गरे । एक मात्र सान्तवना गोल हिमालय दर्शनका लागि नारायण खड्काले गरे । खेलको म्यान अफ द म्याच रेडस्टारका नामसाङ लिम्बू भए ।

प्रतियोगिताको उद्घाटन कार्यक्रमका प्रमुख अतिथि विराटनगर महानगरपालिकाका प्रमुख भीम पराजुली, एन्फाका सह–महासचिव वसन्त अर्याल, नेकपा मोरङका युवा तथा खेलकुद विभाग प्रमुख पर्शुराम बस्नेत, क्लबका अध्यक्ष रोहित कोइरालालगायतले शुभकामना दिएका थिए ।

प्रतियोगितामा ग्रिनल्याण्ड, निहारिका, रेडस्टार, हिमालय दर्शन, कान्तिपुर, कोशी मल्टिपल, बुद्ध इंग्लिस बोर्डिङ र महेन्द्र मेमोरियल एकेडेमीको सहभागिता रहेको छ ।

प्रतियोगिताको विजेताले नगद १ लाख ११ हजार र उपविजेताले नगद ७५ हजार रुपैयाँ प्राप्त गर्ने छन् । सर्वोत्कृष्ट खेलाडीले नगद १५ हजार रुपैयाँका साथ १ वर्षको ५ लाख रुपैयाँको बिमा, उत्कृष्ट गोलरक्षकले नगद १० का साथ २ लाख ५० हजार रुपैयाँको १ वर्षका लागि बिमा, सर्वाधिक गोलकर्ताले नगद १० का साथ २ लाख ५० हजार रुपैयाँको १ वर्षका लागि बिमा प्राप्त गर्ने छन् । त्यस्तै उत्कृष्ट डिफेन्स र मिडफिल्डले जनही नगद १० हजार रुपैयाँ प्राप्त गर्ने छन् ।

बिहीबारको पहिलो खेल विराटनगरका कान्तिपुर र कोशी कलेज तथा दोस्रो खेल ग्रामथानको बुद्ध इंग्लिस बोर्डिङ स्कूल र दुहबीको महेन्द्र मेमोरियल एकेडेमीबीच हुनेछ ।

यो खबर पढेर तपाईलाई कस्तो महसुस भयो ?

तपाईको प्रतिक्रिया

*

pabson Brt

खबर पूर्वाञ्चल

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक:
पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: pushpa.biratnagar@gmail.com
सम्पादक – डिल्ली पोखरेल, ९८५२०२२३९२
सुचना तथा प्रसारण विभाग दर्ता नं. ०७५७/०७४/७५