कोकाकोला अन्तर विद्यालय स्तरिय फुटबल प्रतियोगिताको उपाधी भानुभक्तलाई,सन्तोष चौधरी सम्मानीत

विराटनगर, १८ साउन भानुभक्त मेमोरियल बोर्डिङ स्कूलले कोकाकोला अन्तर विद्यालय स्तरिय फुटबल प्रतियोगिताको उपाधी हात पारेको छ ।

मोरङ जिल्ला फुटबल संघले मोरङको दुई क्षेत्रमा विभाजन गरेर प्रतियोगिता आयोजना गरेको थियो । विराटनगर ‘क’ क्षेत्रको विजेता सत्यनारायण माविलाई पथरी ‘ख’ क्षेत्रको विजेता लक्ष्मीमार्गको भानुभक्त मेमोरियल बोर्डिङ स्कूलले आज विराटनगरमा फाइनल खेलमा पराजित गरी उपाधि हात पारेको हो ।

प्रतियोगितामा भानुभक्तले सत्यनारायण माविलाई टाइब्रेकरमा ४–३ गोल अन्तरले पराजित गरेको थियो । भानुका खेलाडीले पहिलो गोल गर्दै टिमलाई अग्रता दिलाएका थिए । सत्यनारायणका खेलाडीले भानुको अग्रतालाई धेरै समय टिक्न दिएन र गोल गर्दै खेल बराबरीमा ल्याए । निर्धारित समयमा दुवै टिमबाट १–१ गोलको बराबरी भएपछि खेलको निर्णय टाइब्रेकरबाट भएको हो ।

प्रतियोगिताको विजेता तथा उपविजेतालाई विराटनगर महानगरपालिकाका प्रमुख भीम पराजुलि, एन्फाका केन्द्रीय सदस्य बसन्त अर्याललगायत पुरस्कार वितरण गरे । प्रतियोगितामा विराटनगरको विराट स्पोर्टस हाउसले खेल सामाग्री तथा नगद सहयोग गरेको थियो ।

सोही अवसरमा खेलकुद क्षेत्रमा विशेष योगदान दिएको भन्दै जानकी पोलिट्याङका प्रवन्ध निर्देशक सन्तोष चौधरीलाई सम्मान गरिएको थियो ।