पूर्वाञ्चल खबर
“अहिलेको समय प्रविधिको हो, त्यसैले शिक्षामा यसको प्रयोग गर्ने हो, आईटी चलाउने हो,” प्रिन्सिपल पुरीले भने, “तर यसको सदुपयोग मात्र गर्ने हो, दुरुपयोग होइन ।” उनले विद्यार्थीहरूले आर्जन गरेको ज्ञान र प्रमाणपत्र व्यवहारमा ‘बिक्ने’ र समाजका लागि उपयोगी हुनुपर्ने धारणा राखे । प्रिन्सिपल पुरीले विद्यार्थीहरूको लगनशीलता र मेहनतका कारण शतप्रतिशत नतिजा सम्भव भएको उल्लेख गर्दै आगामी शैक्षिक यात्राको शुभकामना दिए । “हाम्रा विद्यार्थीहरू अत्यन्तै मेहनती छन्, उनीहरूकै लगावको प्रतिफल आज यो सफलता हात लागेको हो,” उनले थपे ।
विगत ३३ वर्षदेखि सञ्चालित यस विद्यालयले २०५७ सालदेखि एसएलसी हालको एसईईमा सहभागिता जनाउँदै आएको छ । यो विद्यालयको २६ औँ ब्याच भएको जानकारी दिँदै पुरीले समयको बदलिँदो गतिसँगै शैक्षिक गुणस्तरमा थप निखार आएको दाबी गरे ।
समारोहमा यस वर्षको एसईई परीक्षामा उत्कृष्ट नतिजा सहित उत्तीर्ण भएका विद्यालयका १९३ जना विद्यार्थीहरूलाई सम्मान गरिएको थियो । विद्यालयका अनुसार अमन यादवले ४ जीपीए प्राप्त गरेका छन् भने १७६ जना विद्यार्थीले ३.६१ देखि ४ जीपीए हासिल गरेका छन् । त्यस्तै, १७ जना विद्यार्थीले ३.२५ देखि ३.६० जीपीए प्राप्त गरेको विद्यालयले जनाएको छ ।
सम्मानित विद्यार्थीहरूलाई कार्यक्रमका प्रमुख अतिथि एवं जिल्ला शिक्षा तथा समन्वय एकाइ मोरङका प्रमुख शालिग्राम दाहाल र प्रिन्सिपल पुरीले कदरपत्र, खादा र दोसल्ला ओढाएर सम्मान गरेका थिए ।
प्रमुख अतिथि दाहालले एभरेष्ट स्कुलले गुणस्तरीय शिक्षामा पुर्याएको योगदानको प्रशंसा गरे । समारोहमा सफल विद्यार्थीका अभिभावक, शिक्षक र स्थानीय शिक्षाप्रेमीहरूको उपस्थिति रहेको थियो ।
