पूर्वाञ्चल खबर
शुक्रबार राति औपचारिक रूपमा एमाले प्रवेश गरेका न्यौपानेले देश र लोकतन्त्रको हितलाई प्राथमिकता दिँदै आफूले नयाँ राजनीतिक यात्रा सुरु गरेको बताएका हुन् ।
आज विराटनगरमा आयोजित पत्रकार भेटघाट कार्यक्रममा बोल्दै उनले देशलाई विनासतर्फ धकेल्ने शक्तिसँग बसिरहनु भन्दा राष्ट्र निर्माणको स्पष्ट दृष्टिकोण बोकेको दल रोज्नु आफ्नो कर्तव्य ठानेको बताए । “म देश बचाउने अभियानमा लाग्न चाहन्छु, त्यसैले एमाले रोजेको हुँ,” उनले स्पष्ट शब्दमा भने ।
न्यौपानेका अनुसार एमालेको राष्ट्रवादी विचार, संगठनात्मक मजबुती र स्वाभिमानी राजनीतिक धारले आफूलाई आकर्षित गरेको हो । “एमालेले राष्ट्रियता, स्थिरता र विकासलाई केन्द्रमा राखेर राजनीति गरिरहेको छ, यही कारण मैले यो निर्णय लिएँ,” उनले बताए ।
यस क्रममा उनले राष्ट्रिय स्वतन्त्र पार्टीप्रति गम्भीर असन्तुष्टि पनि व्यक्त गरे । पार्टी एक व्यक्तिको नियन्त्रणमा सीमित भएको र अदृश्य विदेशी प्रभावबाट सञ्चालन भएको आरोप लगाउँदै उनले पार्टीको आन्तरिक लोकतन्त्र कमजोर भएको टिप्पणी गरे । “पार्टी सही दिशामा नहिँडेको मैले नजिकबाट महसुस गरेँ । बेलैमा सही निर्णय लिनु आवश्यक ठानेर बाहिरिएको हुँ,” उनले भने ।
