खबर पूर्वाञ्चल
गाजाको इस्लामिस्ट समूह हमासले गत शनिबार इजरायलमाथि गरेको आक्रमणमा परी राजेशसहित १० जना नेपाली विद्यार्थीको मृत्यु भएको छ।
कामसँगै अध्ययनका लागि राजेश गत भदौ २६ गते इजरायल पुगेका थिए । त्यहाँ पुगेसँगै काममा लागेका उनी परिवारको सम्पर्कमै थिए । राम्रैसँग दिनहरु गुजारिरहेका थिए । परिवारका साइलो छोरा उनी इजरायल गएसँगै घरमा पनि खुसीको आशा पलाएको थियो । तर दुर्भाग्य गत शनिबारदेखि उनको परिवारसँग सम्पर्क टुट्यो ।
त्यहीबेला इजरायलमाथि प्यालेस्टिनी कट्टरपन्थी समूह हमासले भीषण आक्रमण गरेको खबर संसारभर फैलियो । इजरायलमा भएको आक्रमणको खबरसँगै परिवारका सदस्य चिन्तामा परे । उनीसँग परिवारको सम्पर्कको लागि कैयौं प्रयास भयो । तर सम्पर्क हुन सकेन ।
त्यसपछि राजेशका बुवा राजकुमार र आमा कैलाशले शनिवार साँझ छोराको दीर्घायुको कामनासहित पूजा आराधना गर्न घर नजिकको मन्दिरमा पुगे । इजरायलमा हमासले गरेको आक्रमणको खबर सुनेको र छोरासँग पनि सम्पर्क नभएको अवस्थामा चिन्तित बनेका उनीहरूले छोरालाई केही नहोस् भनेर भगवान् पुकारे । तर, दुर्भाग्य मन्दिरबाट फर्किँदै गर्दा छोराको मृत्युको खबर सुन्नुप¥यो, त्यसपछि राजेशको आमाको होसहवास उड्यो ।
‘राजेशको दीर्घायुको कामना गर्दै माइलो विनोद र कान्छा भाइ चन्दनलाई लिएर ममीबुवा साँझमा मन्दिर जानुभएको थियो,’ जेठा दाइ मुकेशले भने, ‘मन्दिरबाट आउँदै गर्दा छिमेकी भाउजूले कान्छो भाइलाई इजरायलस्थित नेपाली दूतावासले सार्वजनिक गरेको नाम देखाइदिनुभएछ । भाइले राजेश दाइ रहनुभएन भनेपछिबाट आमा त्यसपछि बेहोस हुनुभयो । अहिले त घरमा असाध्यै पीडा छ, गाउँ पूरै शोकमा डुबेको छ ।’
शुक्रवार मात्र जेठा दाजु मुकेशसँग राजेशको कुरा भएको थियो । ‘भाइले होटलमा बस्न भन्यो । २५ सय भाडा लाग्छ भनेको थियो । दाइ, भोलि कुरा गरौंला, अहिले खाना खाने बेला भयो भन्यो । शनिवार यहाँ छुट्टी हुन्छ, अलि लामो गफ गरौंला भनेको थियो,’ मुकेशले गहभरी आसु पार्दै भाइसँग भएको संवाद सुनाए ।
