पूर्वाञ्चल खबर
हाटखोलास्थित गुरुकुलको बालकृष्ण पोखरेल नाटकघरमा सम्पन्न भएको महोत्सवमा बाल मनोविज्ञान, सामाजिक विकृति, मेलमिलाप र सहिष्णुता जस्ता विषयहरुमा नाटक तयार गरेर विद्यार्थीहरुले अभिनय गरेको पूर्वाञ्चल स्कुलको ‘स्वाद’ उत्कृष्ट नाटक घोषणा हुँदै पुरस्कृत भएको हो ।
यस अघि आज १० औँ तथा अन्तिम दिन कान्तिपुर माध्यमिक विद्यालयले नाटक ‘आमा’ मञ्चन गर्यो । जस्तोसुकै दुःखमा पनि विचलित नभइ सन्तान सुखका लागि लागिपर्ने तमाम आमाहरुलाई एकाकार रुपमा हेर्दै अभिभावक र सन्तानप्रतिको सम्बन्ध देखाउन खोजिएको उक्त नाटकबाट सन्तालाई सम्पत्ति भन्दा पनि संस्कारको आवश्यकता पर्छ भन्ने सन्देश दिइएको थियो । विद्यालय कै विद्यार्थी आयुषा कार्कीद्धारा लिखित तथा शिक्षक करुण पोखरेलद्धारा निर्देशिक नाटकमा लेखक कार्कीसँगै एन्जिला चौधरी, रेश्मिना कोइराला, लिजा जैसवाल, खुश्बु यादव, इशु साह, श्वेता दास लगायतले अभिनय गरेका थिए ।
उक्त नाटकसँगै समापन भएको महोत्सवमा विराटनगरका विभिन्न ९ विद्यालयका विद्यार्थीले नाटक प्रस्तुत गरेका थिए । यस्तै ‘कोपिला’मा अभिनय गर्ने ग्रिनल्याण्ड स्कुलका विद्यार्थी आरभ कोइराला उत्कृष्ट अभिनेता र सम्पदा निरौला उत्कृष्ट अभिनेत्री घोषणा हुँदै पुरस्कृत भए ।
गुरुकुलले विद्यालय नाटक महोत्सवको तेस्रो संस्करण आयोजना गरेको हो । आवेदनका लागि फारम भरिसकेका विद्यालय छनोट गरी निशुल्क प्रशिक्षण तथा प्राविधिक सहयोग गरी प्रोत्साहन गरेको गुरुकुलले विद्यार्थी र रङ्गमञ्च जोड्ने पुलको काम गरेको गुरुकुल विराटनगरका अध्यक्ष भैरव क्षेत्रीले बताए ।
