पूर्वाञ्चल खबर
विराटनगर / विराटनगर महानगरपालिकाले एकदिने निःशुल्क पशु स्वास्थ्य शिविर आयोजना सम्पन्न गरेको छ ।
आज महानगर स्थित वडा नं १९ मा गरिएको शिविरमा ५सय ८ वटा पशुको स्वास्थ्य परिक्षण गरिएको भेटनरी शाखा प्रमुख हिरालाल यादवले जानकारी दिए । शिविरमा नाम्लेजुकाको औषधी वितरण ,बेरामी पशुको परिक्षण ,गर्भपरिक्षण ,शल्यक्रिया ,बोका र बहरको बन्ध्याकरण लगायतका काम गरिएको छ ।
महानगर भित्रका केही वडाहरुमा कृषकहरुको राम्रै बस्ति छ । यसखाले कार्यक्रमले कृषकहरु लाभान्वित भएका छन् । पशुवाट मानिसले धेरै लाभ लिए पनि पशु प्रति गरिने ब्यवहारमा परिवर्तन ल्याउन भन्दै महानगरले यसखाले कार्यक्रम ल्याएको हो । शिविरमा सहभागि भएका मेयर भीम पराजुलीले मानवले पशुहरु बाट लिने लाभ संगै उनीहरुप्रति गरिने ब्यवहारमा सद्भाव देखाउन निशुल्क स्वास्थ्य शिविर आयोजनाका लागि पहलकदमी लिएको बताए ।
महानगर भित्रका पशु पालक कृषकलाई लाभ हुने गरी थप कार्यक्रम ल्याइने मेयर पराजुलीले बताए । यस्तै वडाध्यक्ष बद्री सरदारले आफ्नो वडामा पशुपालक कृषकको संख्या बढी भएको र लाभान्भित भएको बताए ।
