पूर्वाञ्चल खबर
विराटनगर / प्रदेश १ को राजधानी विराटनगरमा आज सर्वसाधारणहरुलाई निःशुल्क मास्क वितरण गरिएको छ ।
विश्वव्यापी रुपमा फैलिँदै गएको नोभेल कोरोना भाईरसको संक्रमणबाट बच्न विराटनगरको हनुमान मन्दिर अगाडी उभिएर युवाहरुले सर्वसाधारणलाई मास्क वितरण गरिएको अभियन्ता चांद बाबु इराकीले बताए ।
सामाजिक अभियन्ता चान्द ईराकीको पहलमा विभिन्न दाताहरुको सहयोगमा हजार थान टु लेयर मास्क सङकलन गरी वितरण गरिएको छ । कोरोना भाईरसको नाममा जारी कालाबजारीलार्इ पनि निरुत्साहित पार्ने उद्देश्यले मास्क वितरण गरिएको अभियन्ता ईराकीले बताए ।
कार्यक्रममा बोल्दै अखिल नेपाल राष्ट्रिय स्वतन्त्र विद्यार्थी युनियनका केन्द्रीय सचिव वसीम आलमले कोरोना भाईरसको नाममा मास्कको कृत्रिम अभाव सिर्जना गरी पैसा कमाउनेलाई समेत अबिलम्ब कारबाहीको दायरामा ल्याउन आग्रह गरे ।
मोरङ प्रहरीका प्रहरी उपरीक्षक विश्व अधिकारीले कोरोना भाईरसबाट जोगिन सर्वप्रथम आफैले संयमता अपनाउनुपर्ने धारणा व्यक्त गरे । उनले भाईरसको नाममा आतङक फैलाउने र कालाबजारी गर्नेलाई कानुनको दायरामा ल्याउन सबै आम नागरिक पनि जागरुक हुनुपर्ने बताए।
मास्क वितरणको क्रममा सर्वसाधारणहरुलाई कोरोना भाईरसको लक्षण र यसबाट जोगिन अपनाउनुपर्ने सावधानीहरु बारे समेत जानकारी गराईएको थियो ।
