पूर्वाञ्चल खबर
नेपाल सरकारले निर्धारण गरेका मापदण्ड पुरा गर्दै प्रदेश १ बाट एभरेष्ट मात्र उत्कृष्ट विद्यालय बन्न सफल भएको हो । नेपाल सरकारले कक्षा १२ सम्मको माध्यामिक शिक्षा उत्तिर्ण परिक्षा (कक्षा १२ ) मा सामुदायिक तीन र संस्थागततर्फका तीन विद्यालयलाई छनौट गरेको हो ।
यस्तै कक्षा १० सम्मको माध्यामिक शिक्षामा सामुदायीक र संस्थागत तर्फका ६ वटा विद्यालय छनौटमा परेका हुन् । नेपाल सरकार शिक्षा, विज्ञान तथा प्रविधि मन्त्रालयद्धारा प्रकाशित सूचना अनुसार माध्यामिक शिक्षा उत्तिर्ण परिक्षा (कक्षा १२ ) मा राष्ट्रिय स्तरमा उत्कृष्ट हुने सामुदायिक विद्यालयतर्फ कास्कीको अमरसिंह माध्यामिक विद्यालय, काठमाडौंको विश्व निकेतन मावि, ललितपुरको बज्रबाराही मा.वि छन् । संस्थागत तर्फ मोरङ विराटनगरको एभरेष्ट इङ्गिलस बोर्डिङ मा.वि, भक्तपुरको एस. ओ. एस. हरमन माइनर मा. वि. र ललितपुरको नेशनल सेकेण्डरी स्कुल छन् ।
माध्यमिक शिक्षा परिक्षा (कक्षा १०) मा सामुदायीक तर्फ कास्कीको शितलादेवी सामुदायिक मा.वि.,ललितपुरको त्रिपद्म विद्याश्रम माध्यामिक विद्यालय र रुपन्देहीको कालिका मा.वि. छन् । संस्थागततर्फ कास्की मदरल्याण्ड मा.वि., ललितपुरको जेम्स मा.वि. र काठमाडौंको ज्ञान निकेतन मा.वि. उत्कृष्ट भएका छन् ।
उत्कृष्ट हुने विद्यालयहरुलाई ३९ औं राष्ट्रिय शिक्षा दिवस २०७५ तथा अन्तर्राष्ट्रिय साक्षरता दिवसको अवसरमा शनिवार पुरस्कृत गरिने छ । पुरस्कार एक समारोहका बिच प्रधानमन्त्री केपी शर्मा ओलीले प्रदान गर्ने बताइएको छ ।
क्षेत्रीयस्तरका तीनपटक पुरस्कार पाइसकेको एभरेष्टले यसपटक राष्ट्रिय पुरस्कार प्राप्त गरेको हो । उत्कृष्टमा विद्यालय छनौट भएपछि विद्यालयका प्रिन्सिपल टीकाराम पुरीले यो सफलताले थप जिम्मेवारी थपेको बताए । उनले भने,‘हामीले उत्कृष्टताका निरन्तर पुरस्कार प्राप्त गर्दै आएका छौं, ति मध्ये यो ठूलो पुरस्कार हो । यसलाई कायम राख्दै अघि बढ्न हामीलाई थप जिम्मेवार बनाएको छ ।’ विद्यालय स्थापना भएको २५ औं वर्षमा पाएको यो उपलब्धिलाई उनले रजतजयन्तीको सुन्दर उपहारका रुपमा लिएको प्रतिकृया दिए । आगामी दिनमा पनि यस्ता सफलता प्राप्त गरिरहने प्रतिबद्धता व्यक्त गरेका प्रिन्सिपल पुरीले शैक्षिक गुणस्तर कायम गर्दै अब प्राविधिक शिक्षातर्फ अघि बढ्ने बताए ।
प्रदेश १ बाट देशभरकै उत्कृष्ट विद्यालय बन्नु सवैका लागि उपलब्धिको विषय भएको अभिभावक संघ प्रदेश १ का प्रमुख देवी पन्थीले बताए । उनले यो सफलता विराटनगरबासीको मात्र नभएर प्रदेशबासीकै रहेको बताए । ‘पूर्व शैक्षिक हव हो भन्ने विषयलाई यसले पुष्टि गरेको छ’अभिभावक पन्थीले भने,‘अन्य शैक्षिक संस्थाले पनि शिक्षालाई व्यापार मात्र नबनाई शैक्षिक गुणस्तर बृद्धि गर्दै यस्ता उपलब्धिहरु हासिल गर्न सक्नुपर्छ ।’
