२४ मंसिर,विराटनगर / कलाकारिता क्षेत्रमा लामो समयदेखि सक्रिय कलाकार रुद्र (आरपी) भट्टराइ(‘राजालाम’)को निधन भएको छ । भट्टराईको विराटनगर ११ मधुमारामा फुपुको घरमा सुतेकै ठाउँमा निधन भएको हो ।
भट्टराई जातिको देवाली पूजाको लागि चार दिन अगाडी उनी काठमाण्डौबाट विराटनगर आएका थिए । बिहीबार बेलुकी फूपूको घरमा गएका भट्टराई बिहान मृत अवस्थामा भेटिएका थिए ।
बेलुकी खाना खाएर सुतेका आरपी बिहान मृत भेटिएको उनका भाई हरीले बताए । ४२ बर्षका आरपी प्रेसर र सुगर रोगबाट पीडित थिए । उनी आफ्नो मोटो शरीरका कारण चिन्तित थिए । उनका १७ र १३ वर्षका दुई छोरा र श्रीमति रहेका छन् । आरपी जेठा छोरा हुन । पछिल्लो समय उनले अभिनय गरेको चलचित्र ‘छक्का पन्जा’ अहिले हलमा चलिरहेको छ ।
उनले चलचित्र ‘वडा नम्बर ६’ लगायतका केहि सफल चलचित्रमा काम गरेका छन् । हाँस्य सिरियल ‘तितो सत्य’मा काम गरेपछि उनको चर्चा चुलिएको थियो । यहि, सिरियलबाट उनलाई ‘राजालाम’ उपनामले दर्शकले चिन्ने गर्थे ।
उनको विराटनगरको हाटखोलमा रहेको परोपकार घाटमा अन्त्यष्टी गर्ने परिवारले जनाएको छ ।
