पूर्वाञ्चल खबर
विराटनगर–५ सम्झना टोलका ५८ वर्षीय न्यौपानेविरुद्ध जिल्ला सरकारी वकिलको कार्यालयमार्फत मोरङ प्रहरीले आज ‘जबरजस्ती करणी उद्योग’मा अभियोगपत्र दर्ता गरेको हो ।
निर्माण व्यवसायी संघ मोरङका पूर्वमहासचिवसमेत रहेका न्यौपानेले भदौ २६ गते विराटनगर–४ स्थित नोबेल अस्पतालअगाडिको एक होटलमा लगेर १४ वर्षीया किशोरीमाथि जबरजस्ती करणीको प्रयास गरेको अभियोगपत्रमा उल्लेख छ । घटनाको भोलिपल्ट भदौ २७ मा किशोरीले दिएको जाहेरीका आधारमा प्रहरीले न्यौपानेलाई पक्राउ गरेको थियो ।
मोरङ प्रहरीले अनुसन्धान पूरा गरी बुधबार सरकारी वकिलको कार्यालयमा अनुसन्धान प्रतिवेदन बुझाएको थियो । त्यसपछि सरकारी वकिलको कार्यालयले अदालतमा अभियोगपत्र दायर गरेको हो ।
अदालतका सूचना अधिकारी हेमबहादुर बुढाथोकीका अनुसार न्यौपानेको शुक्रबार बयान लिइनेछ । बयान सकिएपछि सोही दिन थुनछेक बहस हुनेछ । बहसपछि अदालतले उनलाई पुर्पक्षका लागि थुनामा पठाउने वा धरौटी अथवा साधारण तारेखमा राख्ने विषयमा आदेश गर्नेछ ।
