खबर पूर्वाञ्चल
बेलबारी / मोरङको बेलबारी लक्ष्मीमार्गमा जारी आठौं बेलबारी अन्तर्राष्ट्रिय आमन्त्रण रनिङ गोल्डकपमा झापा ११ लाई पराजित गर्दै भोजपुर अन्तिम चारमा प्रवेश गरेको छ ।
आज भएको रोमाञ्चक खेलमा गोलरक्षक समीर क्षेत्री नायक बन्दा भोजपुरले झापालाई पेनाल्टी सुटआउटमा ५–४ गोल अन्तरले स्तब्ध बनाउँदै भोजपुर अन्तिम चारमा पुगेको हो ।खेलको निर्धारित समय १–१ गोलको बराबरीमा सकिएपछि नतिजाको छिनोफानो पेनाल्टी सुटआउटबाट गरिएको थियो । पेनाल्टी सुटआउटमा भोजपुरका लागि विबेक राई, धिरेन क्षेत्री, विवेक राई (बि), मिसाज लिम्बू र सुजन चौधरीले गोल गर्दै टोलीको जित सुनिश्चित गरे ।
झापाका सिमान्त थापामगरले प्रहार गरेको बल भोजपुरका गोलरक्षक समीरले उत्कृष्ट बचाउ गर्दै टोलीलाई सेमिफाइनलमा पुर्याए ।झापाका तर्फबाट मुसा कामाकाट, एरोन थापा मगर, पेमा तामाङ र सुमन थापाले मात्र गोल गर्न सके ।
यस अघि भएको खेलको ३९ औं मिनेटमा झापाका एरोन थापा मगरले गोल गर्दै टोलीलाई अग्रता दिलाएका थिए । तर, झापाको त्यो अग्रता एक मिनेट पनि टिक्न सकेन । लगत्तै ४० औं मिनेटमा भोजपुरका मिलन लिम्बुले गोल फर्काउँदै खेललाई बराबरीमा ल्याएका थिए ।
निर्धारित समयमा झापाले पाएका थुप्रै अवसरहरू गुमाउँदा प्रतियोगिताबाट बाहिरिन बाध्य भयो । खेलको २१ औं मिनेटमा झापाका एरोन थापा मगरको शक्तिशाली प्रहारलाई भोजपुरका गोलरक्षक समीर क्षेत्रीले पन्च गरेर उत्कृष्ट बचाउ गरेका थिए । लगत्तै भोजपुरका मिलन लिम्बुको सशक्त प्रहार बाहिरिँदा भोजपुरले पनि जितका लागि टाइब्रेकरसम्म कुर्नुपर्यो ।
खेलको नायक बनेका भोजपुरका गोलरक्षक समीर क्षेत्री ‘प्लेयर अफ द म्याच’ घोषित भए । मंगलबारको खेल रारा फुटबल क्लब, राजारानी धनकुटा र ‘बी’ डिभिजन लिग च्याम्पियन प्लानिङ ब्वाइज युनाइटेड क्लबबीच हुनेछ ।
प्रतियोगिताको विजेताले नगद आठ लाख र उपविजेताले नगद चार लाख रुपैयाँ पुरस्कार प्राप्त गर्नेछन् ।
