खबर पूर्वाञ्चल
दुहबी नगरपालिका–४ शिव मन्दिर चोकमा चन्द्रिका रौनियारको नयाँ बन्दै गरेको घरको सेफ्टी ट्यांकीभित्र आज विहान १० बजेतिर शव फेला परेको सुनसरी प्रहरीका प्रवक्ता डीएसपी योगराज खतिवडाले बताए। उनका अनुसार दुहबी–२ का अन्दाजी ५० वर्षीय श्यामबहादुर तामाङ र ३२ वर्षीय रमेश राईको शव सेफ्टी ट्यांकीभित्र फेला परेको हो।
प्रहरीका अनुसार मृत फेला परेका तामाङ उक्त घर बनाउने पेटी ठेकेदार र राई कामदार हुन्। सेफ्टी ट्यांकीभित्र २ जनाका शव रहेको जानकारी पाउनासाथ इलाका प्रहरी कार्यालय दुहबीबाट प्रहरी निरीक्षक सागर तिमिल्सिनाको नेतृत्वमा टोली घटनास्थल पुगेको छ।
घटनाको अनुसन्धानका लागि फोरेन्सिक विज्ञसहितको टोली घटनास्थलतर्फ जाँदै छ। धरानको बीपी कोइराला स्वास्थ्य विज्ञान प्रतिष्ठानबाट फोरेन्सिक विज्ञ झिकाइएको हो। घटनास्थल इलाका प्रहरी कार्यालय दुहबीबाट करिब २ किलोमिटर पूर्वमा पर्छ।
डीएसपी खतिवडाले दुवै जनाको शव अहिले घटनास्थलमै रहेको र मृत्युको कारण पत्ता लाग्न बाँकी रहेको बताए। उनका अनुसार अनुसन्धानपछि मात्र उनीहरूको हत्या भएको हो कि होइन भन्ने कुरा पत्ता लाग्नेछ।
