खबर पूर्वाञ्चल
साना हात नेपाल नामक संस्थाले तीन दिनको अवधिमा विराटनगरको सीमा क्षेत्र र जोगबनी नाकाबाट ती महिलाहरूलाई उद्धार गरेको हो ।
संस्थाका शाखा प्रमुख विवस श्रेष्ठका अनुसार बिहीबार ७ जना र केही दिनअघि ९ जना गरी जम्मा १६ महिलालाई उद्धार गरिएको हो । उद्धार गरिएका महिलाहरू झापा, बारा, काठमाण्डौ र मोरङलगायतका विभिन्न जिल्लाबाट आएका हुन् । उनीहरूमध्ये केही अविवाहित किशोरीहरू पनि छन् ।
श्रेष्ठका अनुसार काठमाण्डौबाट वैदेशिक रोजगारीमा पठाउने प्रक्रिया सफल नभएपछि दलालहरूले भारत हुँदै तेस्रो मुलुकमा पठाउने योजना बनाएका थिए । ती महिलालाई दुवई, कुवेत, ओमानलगायतका खाडी मुलुकमा घरेलु कामदारका रूपमा मासिक ३५ हजारदेखि ४० हजार रुपैयाँ कमाइ हुने आश्वासन दिइएको थियो ।
दलालहरूले महिलाहरूलाई “जोगबनीमा खाद्य वस्तु किन्न गएका” भन्ने बहानामा सीमा पार गराउन खोजेको संस्थाले जनाएको छ । अवैध रूपमा वैदेशिक रोजगारमा पठाउन खोजिएको भन्दै संस्थाले तत्काल उद्धार गरी महिलाहरूलाई प्रहरीले रोहवरमा आफन्तको जिम्मा लगाउने प्रक्रिया अघि बढाएको छ ।
यस घटनामा संलग्न वैदेशिक रोजगार एजेन्टहरू भने फरार रहेका छन् । साना हात नेपालले मानव बेचबिखन तथा अवैध तस्करी रोक्न सीमावर्ती क्षेत्रमा निगरानी तथा जनचेतनामूलक कार्यक्रम पनि सञ्चालन गरिरहेको छ ।
