खबर पूर्वाञ्चल
विराटनगर–८ स्थित हलेसी महिला सशक्तिकरण सेवा केन्द्रले आयोजना गरेको उद्घोषण तालिमको समापन समारोहलाई सम्बोधन गर्दै मेयर कोइरालाले तालिम लिइसकेपछि धेरैजसोमा बिर्सिने संस्कार रहेको गुनासो गरे । “कतिपय तालिमहरु तालिममै सीमित हुने गरेको छ,” मेयर कोइरालाले भने, “तालिममा सिक्नु ठूलो कुरा होइन सिकेको सीपलाई व्यवहारमा लागू गर्नु चाहिं ठूलो कुरा हो ।” मेयर कोइरालाले महानगरले रोजगारमूलक तालिमलाई बढी जोड दिएको सुनाए । उद्घोषण तालिम पनि व्यक्तिका लागि महत्वपूर्ण हुने उनको भनाइ थियो । हरेक कार्यक्रम गर्दा उद्घोषकको भूमिका महत्वपूर्ण हुने उनले बताए । उनले तालिममा सिकेका सीपलाई सैद्धान्तिकभन्दा प्रयोगमै उतार्नुपर्नेमा जोड दिए ।
विराटनगर महानगरपालिकाको आर्थिक सहयोगमा शुक्रबारदेखि सुरु भएको तालिम आज सम्पन्न भएको छ । तालिममा सहभागीहरुलाई मेयर कोइरालाले प्रमाणपत्रसमेत प्रदान गरे । पत्रकार धीरज दाहालले सहजीकरण गरेको तालिममा वडा नम्बर ८ का २० जना महिलाको सहभागिता रहेको आयोजक संस्थाकी अध्यक्ष सीता बरालले जानकारी दिइन् । तालिममा सहभागीहरुले अब जस्तोसुकै कार्यक्रममा पनि बोल्न सक्ने भएको अनुभव सुनाएका थिए ।
तपाईको प्रतिक्रिया