आगामी नोभेम्बर ७ मा अष्ट्रियामा खुल्ला भलिबल प्रतियोगिता हुँदै

खबर पूर्वाञ्चल, ३० भाद्र २०७८, बुधबार १८:५०

अष्ट्रिया / नेपाली युरोपियन खेलकुद संघ (एनआइएससी) को आयोजनामा आगामी नोभेम्बर ७ तारिखमा खुल्ला भलिबल प्रतियोगिता हुने भएको छ ।

युरोपमा रहेका नेपालीहरूबीच सद्भाव र भाइचारा अभिवृद्धि गराउने उद्देश्यका साथ एनआइएससीको आयोजनामा अष्ट्रियाको जोसेफ प्रेरिस अली ३, ५०२० साल्बु्रङमा प्रतियोगिता हुन लागेको हो ।

प्रतियोगितामा विभिन्न टिमको सहभागिता रहनेछ । ‘स्वास्थ्यका लागि खेलकुद’ भन्ने मूल नाराका साथ आयोजना हुन लागेको प्रतियोगितामा प्रथम हुने टिमलाई १ हजार युरो र द्वितीय हुने टिमलाई ३ सय युरो पुरस्कारसहित प्रमाणपत्र र ट्रफी प्रदान गरिने एनआइएससीका अध्यक्ष दिलकुमार घमालले जानकारी दिए । उनका अनुसार लगातार ३ वर्ष विजयी हुने टिमलाई नगद २ हजार युरोसहित ट्रफी प्रदान गरिनेछ ।

प्रतियोगितामा सहभागिता हुने टिम दर्ता अक्टुबर २५ तारिखभित्र गरिसक्नुपर्ने अध्यक्ष घमालले बताए । घमालका अनुसार तोकिएको समयभित्र उपस्थिति नहुने टिमले प्रतियोगितामा सहभागिता हुन पाउने छैन । “खेलकुदका माध्यमबाट युरोपमा रहेका नेपालीहरूबीच चिनजान हुनुका साथै विदेशमा रहेर पनि नेपालीहरूले मुलुकको कला र संस्कृतिको विकासमा योगदान दिइरहेका छन् भन्ने प्रस्ट हुन्छ,” अध्यक्ष घमालले भने, “प्रतियोगितामा सांस्कृतिक नृत्यसमेत प्रस्तुत हुनेछ । जहाँ बसेर जे गरे पनि जन्मभूमि र कर्मभूमिकै लागि गरिरहेका हुन्छौं ।”

खेलकुदलाई आत्मसात गरेमा मान्छेले महँगो हिरा, मोती, सुन, चाँदी लगाउनै नपर्ने घमालको भनाइ छ । खेलकुदलाई पनि गहनाका रुपमा आत्मसात गरेमा जीवन सार्थक हुने उहाँको विचार छ । “खेलकुदले मानिसको शरीरलाई स्वस्थ राख्न मद्दत गर्छ,” अध्यक्ष घमाल भने “यदि मानिसको शरीर नै स्वस्थ छैन भने अर्बौं धनसम्पत्ति भएर पनि के गर्नु ? अर्कातर्फ खेलकुदले आपसी सम्बन्ध बढाउनुका साथै मनलाई शान्ति प्राप्त हुन्छ ।”

प्रतियोगिताका लागि तयारी तीव्र पारिएको छ । टिमलाई निमन्त्रण, खेल स्थानको टुंगो, पुरस्कार र ट्रफीको व्यवस्थापनलगायतका कामहरू अन्तिम चरणमा पुगेको घमालले बताए । उनले कार्यक्रममा उपस्थित जनाएर आयोजक र खेलाडीलाई हौसला प्रदान गर्न युरोपमा रहेका नेपालीलाई आह्वानसमेत गरे । “यसमा कुनै राजनीति हुँदैन,” उनले थपे, “राजनीतिभन्दा माथि उठेर खेलकुदको माध्यमबाट आपसी सद्भाव र भाइचारालाई बलियो बनाउने हाम्रो उद्देश्य हो । मलाई लाग्छ राजनीतिले मान्छेका मन र मुटुलाई टुक्याउँछ तर कला साहित्य र संगीतले जस्तै खेलकुदले पनि मान्छेका मन र मुटुलाई जोड्छ ।”

आयोजकका तर्फबाट खेलाडीको टुंगोसमेत लागिसकेको छ । प्रतियोगितामा आयोजकका तर्फबाट अध्यक्ष घमालसहित राजु विश्वकर्मा, अंग शेर्मा, प्रेम रसाइली, ख्याम विश्वकर्मा, रोहित विश्वकर्मा, गर तेम्बा शेर्मा, इल्विन हुम्यान मैदानमा उत्रिनेछन् ।

यसैबीच, एनआइएससीको रिक्त रहेको सचिवमा शिव खड्कालाई मनोनीत गरिएको छ । घमालको अध्यक्षतामा एक वर्षअघि गठन भएको एनआइएससीमा सचिव पद रिक्त रहेको थियो । केही समयअघि बसेको एनआइएससीको बैठकले खड्कालाई सचिवमा मनोनीत गरिएको घमालले जानकारी गराए ।

यो खबर पढेर तपाईलाई कस्तो महसुस भयो ?

तपाईको प्रतिक्रिया

*

खबर पूर्वाञ्चल

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक:
पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: pushpa.biratnagar@gmail.com
सम्पादक – डिल्ली पोखरेल, ९८५२०२२३९२
सुचना तथा प्रसारण विभाग दर्ता नं. ०७५७/०७४/७५