गएरातीको वर्षाको कारण विराटनगरको झरना चौक डुवानमा

वर्षाको कारण विराटनगर महानगरपालिका– ६ झरना चौक रामपुर (स्लाम नगर) पनि डुबानमा परेको छ । पानी निकासको व्यवस्थापन नभएका कारण वर्षेनी डुबानको सास्ती खेप्नु परेको स्थानियवासी मोहम्मद जिया हुसैनले बताए ।

वर्षेनी डुबानमा परेका कारण स्थानिय मिलेर गत वर्ष वडा कार्यालयमा निर्माण कार्यका लागि निवेदन दिएको भएपनि वडाध्यक्षले बेवास्ता गरेको उनको भनाइ छ । डुबानका कारण स–साना बच्चाहरुलाई स्कूल जानदेखि लिएर दैनिक काम गर्न असहज भएको उनले गुनासो गरे । उनका अनुसार केहि समय अगाडी नदीबाट निकास हुँदा त्यो समय खासै समस्यामा परेको थिएन, जब ग्राबेल रोड, पक्कि नाला निर्माण भएसँगै पानी बग्ने निकासमा कमी आएकाले वर्षेनी डुबानको सास्ति भोग्नु परेको हो । उक्त क्षेत्रको निकासको चासो महानगरपालिकाले गर्नुपर्ने भएपनि महानगरले बेवास्ता गरेको उनले बताए ।

आजसम्म उक्त स्थानमा जनता के– कस्तो अवस्थामा बसिरहेका छन् नगरप्रमुखको ध्यानसम्म नगएको उनको गुनासो छ । निर्वाचन ताका उक्त स्थानको समस्यालाई चाँडै सुल्झाउने आशा देखाएर जनप्रतिनिधिहरु दैनिक जस्तो उपस्थित हुने भएपनि हालसम्म कुनै खालको समस्या समाधान नभएको उनको गुनासो छ । प्रदेश सभा सांसद नेपाली काँग्रेसका प्रमुख सचेतक केदार कार्कीको समेत उक्त क्षेत्रको विकासका लागि आश्वासन गरेकोे उनले सुनाए ।

सो स्थानमा नहरदेखि मस्जिदसम्म हिँड्नका लागि स्थानियबासीको सक्रियता र रकम संकलबाट बाटो निर्माण गरिएको उनले जानकारी दिए । उनले भने, ‘अन्य स्थानमा सडक, ढल निकासका लागि नाला निर्माण भईसकेको छ तर यो टोल विकासमा स्थानिय निकायले चासो समेत देखाएको छैन ।’

डुबानमा परेपछि साना नानीहरुलाई स्कूल जान समस्या रहेको स्थानियको गुनासो रहेको छ । हाल कोरोना भाईरस संक्रमणले गर्दा स्कूल बिदा भएकाले नानीहरुलाई स्कूल जान समस्या नभएको भएपनि अन्य समय डुबानको समस्याले नानीहरु स्कूल जानबाट बन्चित हुने गरेको उनहिरुले बताए । सोहि स्थानका फिरोज आलमले वर्षेनी डुबानको सास्ति खेप्दै आएपछि अन्तै बसाइँ सर्ने योजना रहेको बताए । उनी भन्छन्र ‘अब त घर, जमिन बेचेर अन्तै बस्न जान्छु ।’

निर्वाचनको समय यहि क्षेत्रको विकास र निकासको समस्यालाई देखाएर भोट भाग्ने नेताका लागि उनले पनि भोट माग्न सघाएका थिए ।उनी भन्छन्र– ‘हामी त नेताहरुको भोट बैक मात्रै भयौँ । आजसम्म यो क्षेत्रको समस्यालाई बुझ्ने कोशिससम्म गरेका छैनन् । बाटोको समस्या, पानी निकासको समस्या वर्षौदेखि बिद्युत पोल नभएकाले विद्युतको पनि समस्या छ ।’ उनका अनुसार विद्युत प्राधिकरणमा कयौँ पटक विद्युत पोल जडानकालागि निवदेन पेश गरेको भए पनि आजसम्म विद्युत प्राधिकरणबाट उक्त स्थानमा ध्यान गएको छैन ।

यता विराटनगर महानगरपालिका वडा नम्बर ६ पहिलादेखि नै पोखरी क्षेत्र रहेको र पहिलेदेखि नै डुबान क्षेत्र रहेको विराटनगर महानगरपालिका वडा ६ का वडाध्यक्ष विजय कामतले बताए । उक्त क्षेत्रको विभिन्न स्थानमा लगभग ३० लाखको लागतमा विकास निर्माणको कार्य भईरहेको उनको भनाइ छ ।

उनले भने, ‘बाटोहरु माथि, माथि गईरहेको छ, पोखरीमा घर बनाएको कारण समस्या आएको हो । आर्थिक वर्ष २०७७–०७८ को बजेटको डुबान क्षेत्रका लागि नाला, ग्राबेलिङका लागि ३० लाख बजेट निस्कासन गरेको छ ।’ उनले महानगरपालिका– ६ झरना चौक रामपुर (स्लाम नगर) को विकास निर्माणका लागि १५ लाखको ग्राबेलिङ, नालाको काम भएको जिकिर गरे । उक्त स्थानको विकास निर्माणका लागि आगामी योजनामा २५ लाख बजेट विनियोजन गरेको उनको दाबी छ ।…………………