CLASSICTECH NET

मोरङमा बाढीका कारण ४ सय ७० परिवारबाट १ हजार ९ सय ५० जना विस्थापित

खबर पूर्वाञ्चल, २७ असार २०७६, शुक्रबार २०:२७

विराटनगर / तीन दिनदेखि भइरहेको अविरल वर्षापछि आएको बाढीका कारण मोरङमा ४ सय ७० परिवार विस्थापित भएका छन् ।

जिल्ला प्रहरी कार्यालय मोरङका अनुसार मोरङका विभिन्न स्थानमा रहेका खोलाहरुमा आएको बाढीका कारण ४ सय ७० परिवारका १ हजार ९ सय ५० जना विस्थापित भएका छन् । विस्थापित हुने अधिकांश खोला किनारमा बसोबार गर्ने सुकुम्बासी घर परिवार रहेका छन् । विस्थापित परिवारलाई स्थानीय जनप्रतिनिधि र जिल्ला प्रशासन कार्यालय मोरङको सहयोगमा सुरक्षित स्थानमा राखिएको प्रमुख जिल्ला अधिकारी रमेशकुमार केसीले बताए ।

केसीका अनुसार बाढीका कारण सबैभन्दा बढी विराटनगर महानगरपालिका वडा नम्बर १, ८, ६ र १६ प्रभावित बनेको छ । साथै जहदा गाउँपालिका ८, कटहरी गाउँपालिका ४ र धनपालथान गाउँपालिकाको ४ र ५ नम्बर वडाका घर डुवानमा परेका छन् । विस्थापितलाई रेडक्रसको सहयोगमा १ सय बढी त्रिपाल वितरण गरिएको उनले जानकारी दिए । प्रशासन कार्यालयले उद्धार, खोज तथा विपद्मा परेकालाई सुरक्षित स्थानमा लैजाने काम भइरहेको पनि जनाएको छ । स्थानीय त्रसित घरभित्र पानी पसेपछि स्थानीय त्रसित बनेका छन्।

जिल्ला प्रहरी कार्यालय मोरङका अनुसार विराटनगर– ८ मा ५० परिवार विस्थापित भएका छन् । त्यस्तै विराटनगर ७ मा १३ परिवार विस्थापित भएका छन् । विराटनगर १ को विजयपुर सुकुम्बासी बस्तीमा २५ घर,हनुमान मन्दिर छेउ सुकुम्बासी बस्तीका २० परिवार र जिल्ला प्रहरी कार्यालय पछाडी रहेको बस्तीका २० परिवार विस्थापित भएका छन् ।

त्यस्तै विराटनगर– २ को मुसहर बस्तीका २० परिवार, विराटनगर ४ को बरौलीका ७ परिवार, विराटनगर १५ का पारिजात र सुमहर टोलका ५० परिवार, विराटनगर ७ हरियाली टोलका ५० परिवार बाढीका कारण विस्थापित भएका छन् । विराटनगर–१२ धुधुवा, बखरी र ऋसिदेव बस्तीका ३५ परिवार, विराटनगर १९ का २० परिवार बिस्थापित भएका छन् । त्यस्तै कटहरी ४ नया“ बजार सुकुम्बासी बस्तीका १ सय २५ परिवार बाढीका कारण विस्थापित भएका छन् ।

सिंघिया खोलाको बाध फुटेर बस्तीमा पस्दा जहदा गाउँपालिका १ धुनिटोलका ४० परिवार बिस्थापित भएका छन् । डंग्राह खदम खोला बस्तीमा पस्दा बुढीगंगा ७ मा १६ परिवार बिस्थापित भएको जिल्ला प्रहरी कार्यालय मोरङले जनाएको छ । विस्थापित भएकाहरु विद्यालय, आफन्त तथा सुरक्षित स्थानमा त्रिपाल टागेर बसेका छन् ।

जिल्ला प्रहरी कार्यालय मोरङका अनुसार रंगेली–कानेपोखरी सडक खण्डको कानेपोखरी २ को गेउरिया खोलामा हिजोदेखि बेपत्ता भएका एक व्यक्ति अझै फेला पर्न सकेको छैन । अन्दाजी २५–३० वर्षका यूवा खोला तर्ने क्रममा खोलाले मोटरसाइकलसहित बगाएको थियो । उनको पहिचान खुल्न नसकेको प्रहरीको भनाइ छ । यस्तै उर्लाबारीमा घाँसको भारीसहित खोलाले बगाएकी एक महिलालाई प्रहरीले उद्धार गरेको छ ।
सचेत रहन आग्रह प्रमुख जिल्ला अधिकारी केसीले मोरङका बक्राहा, लोहन्द्रा, सिंघीया र केसलीया खोलामा पानीको बहाब बढेकाले सम्पूर्ण सुरक्षा निकाय र जनप्रतिनिधिलाई सचेत रहन निर्देशन गरिएको जानकारी दिए। जिल्ला विपद् व्यवस्थापन समिति मोरङले १७ वटै स्थानीय तहलाई सचेत गराएको उनले बताए। हरेक स्थानीय तहमा विपद् व्यवस्थापन समिति गठन भएको र सबैले विपद् व्यवस्थापन कोष खडा गरेर तत्काल राहात र क्षतिपूर्तीको प्रवन्ध गर्नसक्ने अवस्था सृजना गरेका छन्। सबैसँग सरदर करोडको हाराहारीमा विपद् व्यवस्थापन कोष रहेको प्रजिअ केसीले बताए।

तपाईको प्रतिक्रिया

खबर पूर्वाञ्चल

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक – पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: pushpa.biratnagar@gmail.com
सम्पादक – डिल्ली पोखरेल
सुचना तथा प्रसारण विभाग दर्ता नं. ०७५७/०७४/७५