पूर्वाञ्चल खबर
विराटनगर / प्रेमिका जिस्क्याएको निहुँमा साथीको हत्यामा संलग्न भएको आरोपमा प्रहरीले एक यूवकलाई पक्राउ गरेको छ ।
२०७० कात्तिक १२ गते पथरी शनिश्चरे नगरपालिका– ६ का ३२ वर्षका पारा भनिने हैकमसिंह मगरको हत्यामा संलग्न भएको आरोपमा आइतबार प्रहरीले स्थानीय रुद्र आङ्देम्बेलाई पक्राउ गरेको हो ।
प्रेमिका जिस्काएको आरोपमा विवाद भएपछि २६ वर्षका आङ्देम्बे सहितको समुहले मगरमाथि धारिलो हतियार प्रहार गरेको प्रहरीले बताएको छ । मगर बोल्न सक्दैन थिए । तर राति तिहारमा हिँडाउने नाँचको ‘रिहर्सल’ गर्ने क्रममा विवाद हुँदा उनको ज्यान गुएको हो ।
भोलिपल्ट भागेर भारत पुगेका उनी आइतबार पक्राउ परेका हुन् । उनी गाउँ फर्किएका बेला आइतबार बिहान ८ बजे पक्राउ गरिएको इलाका प्रहरी कार्यालय पथरीका प्रहरी निरीक्षक कमल बजगाईले जानकारी दिए ।
प्रहरीका अनुसार मगरको हत्या ९–१० जनाको समूहले गरेको हो । हत्यामा संलग्न अन्य फरार छन् । पाँच वर्षपछि रुद्र पक्राउ परेपछि अन्य व्यक्तिको खोजी जारी रहेको प्रहरीले बताएको छ । तत्कालिन समयमा प्रहरीले मगरको हत्यामा प्रयोग भएको रगत लागेको खुकुरी र कपडा आङदेम्बेको घरबाट बरामद गरेको थियो ।
