श्रम सहयोगमा एकै दिनमा घर

खबर पूर्वाञ्चल, १४ असार २०७५, बिहीबार ०५:५१

विराटनगर / मोरङको ग्रामथान गाउँपालिका साविक झोरहाट–३ मा आगलागीले बुचनीदेवी सरदारसहितको घर आगलागीले खरानी बन्यो । भए भरको जायजेथा हेर्दाहेर्दै खरानीको डंगुरमा परिणत भएपछि बुचनीदेवीका आँखाबाट अलिन्द्र अश्रुधारा बगिरहे ।

अबको जीवन कसरी चलाउने ? छोराछोरीको भरण पोषण कसरी गर्ने अनि खरानीमा परिणत भएको घरलाई फेरि कसरी ठड्याउने यही पीरले उनको आधा जिउ सुक्यो । भनिन्,‘छिमेकीको घरबाट सुरु भएको आगोले सम्पतिको नाममा भएको हाम्रो सानो घरलाई पनि बाँकी राखेन । कयौं रात पालमुनि बितायौं ।’ उनले ती दिन सम्झदा अहिले पनि कहाली लाग्ने गरेको सुनाइन् ।

बतराई टोलकै बिस्नीदेवी सरदारको पीडा पनि कम छैन । त्यही आगलागीले उनको घर पनि निल्यो । निमेषभरमै घर खरानी भयो । खेतमा काम गर्न गएकी उनले अत्यालिंदै आइन तर केही पनि बचेन । कुनै सामान बाहिर झिक्न पाइनन् । भनिन्,‘तर, हामीले धेरै समयसम्म दुःखमा बस्नु परेन । हाम्रो घर त एकै दिनमा ठडियो ।’ बुचनी र बिस्नीको घर जीवन विकास समाजका स्वयम्सेवकले श्रमसेवा गरी एक दिनमै तयार गरिदिए । बुचनीका अनुसार यसरी घर बन्ला भनेर त उनीहरु जस्ता विपन्न सीमान्तकृत सरदार समुदायले सोचेकै थिएनन ।

गत चैत २ गतेको आगलागीबाट पुरै सखाप भएको टोलका घर बैशाख ७ गते जीवन विकास समाजका डेढ सय जना भन्दा धेरै कर्मचारी र स्वयम्सेवकले एकै दिनमा ठड्याई दिए । समाजको झोराहाट शाखाको पहलमा घर निर्माण गरिएको शाखा प्रमुख मैया राईले बताइन् । भनिन्,‘अहिलेसम्म दुई सयभन्दा धेरै परिवारको घर बनाउने, मर्मत गरिदिनेलगायत काम गरिसकेका छौं ।’ आगलागी पीडितको घर निर्माणमा समाजको केन्द्रीय कार्यालयका कर्मचारी र प्रतिनिधि पनि पुगेका थिए ।

यो खबर पढेर तपाईलाई कस्तो महसुस भयो ?

प्रतिक्रियाहरु

  1. सन्तोष कार्कि लेख्नुहुन्छ

    समाज सेवामा जिवन बिकास सधै अगाडि

तपाईको प्रतिक्रिया

*

खबर पूर्वाञ्चल

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक:
पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: pushpa.biratnagar@gmail.com
सम्पादक – डिल्ली पोखरेल, ९८५२०२२३९२
सुचना तथा प्रसारण विभाग दर्ता नं. ०७५७/०७४/७५