लालबाबु पण्डित भन्छन् ‘टंकीलाई विराटनगरमा गाभ्न नदिने शेखर कोइराला नै हुन’

सर्लाहीको धनघडा भन्ने स्थानमा २०१५ साल मंसिर १९ गते जन्मेका उनी २०३५ सालमा तत्कालिन मालेमा आवद्ध भएदेखि अहिले सम्म पनि अनवरत रुपमा पार्टीमा सकृय छन् । २०४० साल देखि मोरङमा वसेर राजनीति गर्दै आएका छन् । मंसिर २१ गते दोश्रो चरणमा हुने प्रतिनिधिसभा निर्वाचनमा मोरङ क्षेत्र नं ६ बाट प्रतिष्पर्धा गर्दै छन् । निर्वाचनको परिवेसमा रहेर नेता पण्डित गरिएकोकुराकानीको सम्पादित अंश ।

चुनावका मुख्य एजेण्डा के छन् ?
विराटनगर अहिले नाम मात्रैको महानगरपालिका भएको छ । भनौ यो कागतमा मात्रै सिमित छ । यसलाई साच्चैको महानगर बनाउने छु । विराटनगरलाई प्रदेश नं. १ को राजधानी बनाउन दृढ संकल्पित रहने छु । विराटनगरमा बाईपास रोड बनाएर ठुला सवारीका साधन मुख्य सडक भन्दा बाहिरबाट सञ्चालनको व्यवस्था मिलाउने छु । विकास निर्माणको गति यहाँ सुस्त छ । नयाँ जनप्रतिनिधि आएपछि केही गर्नुहोला भनेको त्यो पनि हुन सकेको छैन । उहाँहरुकै ओइलाएर बस्नु भएको छ । विकास निर्माणलाई गति दिने छु । विराटनगरलाई शिक्षा र स्वास्थ्यको केन्द्र बनाउने छु । क्षेत्र नंवर ६ मा रहेको अव्यवस्थित वसोवासलाई व्यववस्थित बनाउने छु । फन पार्क, कृषिमा यान्त्रीकरण, धार्मीक सद्भावको विकास लगायतको काम गर्नेछु ।

साविक टंकीसिनवारीलाई विराटनगर महानगरमा मिसाउन तपाईले पनि खासै भूमिका खेल्नु भएन भनिन्छ नी ?
विराटनगर महानगरपालिकामा साविकको टंकीसिनवारी एक दिन गाभिएर फेरि वुढीगंगा गाउँपालिकामै सिमित भएकोमा मलाई दुःख लागेको छ । मैले टंकीसिनवारीलाई विराटनगर महानगरपालिकामै गाभ्नु पर्छ भनेर ५ वटा जति टोलमा गएर झण्डै १५ हजार हस्ताक्षर संकलन गरेर काठमाण्डौं पनि लिएर गए । तर राज्य पुर्नसंरचना आयोगले निवर्तमान सांसद शेखर कोइरालालाई मनाएर आउनुस् नत्र हामी वुढीगंगा विराटनगरमा मिसाउन सक्दैनौं भन्यो । मैले स्वयंम शेखर कोइरालालाई भने तर उनले त्यसलाई स्वीकार गर्न सकेनन् । त्यसैले गर्दा आज एक दिन विराटनगर महानगरपालिका भएको टंकीसिनवारी गाउँपालिकामा सिमित भएको छ । शेखरकै कारण महानगर हुन नसकेको हो । उनले न विराटनगरलाई महानगर बनाउनु पर्छ भनेर पहलकदमी लिए नत प्रदेशको राजधानीका लागि अग्रसर छन् । उनीबाट यहाँका जनतालाई केही फाईदा छैन । उनी चुनावका वेला मत माग्छ आउँछन् । उनी विकासको बाधक नै हुन भन्दा पनि हुन्छ । चुनाव पछि यहाँका जनतालाई उनले विर्सन्छन् । म त्यस्तो नेता हैन । मैले यहाँको विकास र समृद्धि चाहेको छु ।

तपाई उम्मेदवार भएको क्षेत्र काँग्रेसको गढ मानिन्छ, त्यस माथि लोकतान्त्रिक फोरम पनि सामेल भएको छ ? गा¥हो होला हैन ?
कुनै पनि स्थान कसैको भन्ने हुँदैन । कुनै स्थानमा एक छिनमा सर्प देखिन्छ । फेरि त्यहाँ खोज्न गयो भने हुँदैन । निर्वाचन क्षेत्र पनि त्यस्तो हो । कसैको पेवा हुँदैन । म जनताको विचमा झुट बोल्न जानेको छैन । झुट बोल्दा पनि बोल्दिन । मलाई यो क्षेत्रका जनताले विशेष मायाँ गर्नु हुने छ । मैले विश्वासको मत पाउने छु । त्यसै मतले म विजयी हुने छु । करिव साढे ४ हजार मतले म यहाँबाट विजयी हुने छु । मैले अहिले सपना पनि जितेकै र विपना पनि जितेकै देखिरहेको छु ।

निर्वाचनमा कत्ति खर्च गर्दै हुनुुहुन्छ ? र, यसको व्यवस्थापन कसरी गर्नु भएको छ ।
मैले हाल सम्म तीन वटा निर्वाचनमा प्रतिष्पर्धा गरे । २०४८, २०५१ र २०५६ । तीन वटै निर्वाचनमा गरि मेरो ४ लाख २८ हजार खर्च भयो । २०४८ मा मैले ३० हजार खर्च गरे , २०५१ मा ४८ हजार र २०५६ मा ३ लाख ५० हजार खर्च गरे । यो चुनावमा खर्च गर्ने मसँग पैशा छैन । केही पार्टीले गरिदिने छ भने बाँकी खर्च मलेसियामा रहेका नेपालीले प्रतिव्यक्ति १ सय रुपैयाँ संकलन गरि रहेको मैले खवर पाएको छु ।
उहाँहरुले संकलन गरेर पठाउँदै छौं भन्नु भएको छ । संकलन गरेर जति पठाउनु हुन्छ , त्यहीबाट खर्च हुन्छ । जुन पारदर्शी रुपमा देखिने र त्यो म सार्वजनिक पनि गर्ने छु । पैशाले मत किन्ने हैन मतदाताको मनमा पस्न सक्नु पर्छ ।

लालबाबुलाई मधेश विरोधी भन्छन नी ?
म मधेश विरोधी हैन । म हिमाल, पहाड र तराईलाई जोड्ने व्यक्ति हुँ । म नेपालको नागरिक र मधेशको पुत्र हुँ । मधेशलाई समृद्ध बनाउन म प्रतिवद्ध छु । मधेशी जनता मेरो साथमा छन् ।