पूर्वाञ्चल खबर
प्याब्सन मोरङले आफ्ना सदस्य विद्यालय, शिक्षक, कर्मचारी, विद्यार्थी तथा अभिभावकबाट संकलन गरेको उक्त रकम बुधबार प्याब्सन केन्द्रीय राहत कोषमा जम्मा गरेको हो ।
प्याब्सन केन्द्रीय कार्यसमितिले जारी गरेको सर्कुलरअनुसार मोरङका विभिन्न पालिकामा रहेका सदस्य विद्यालयमार्फत रकम संकलन गरिएको प्याब्सन मोरङका अध्यक्ष जगतबहादुर बस्नेतले जानकारी दिए ।
उनका अनुसार मोरङका १५ पालिकामा रहेका सदस्य विद्यालयबाट संकलित रकम केन्द्रीय राहत कोषमा पठाइएको हो । प्याब्सनले देशभरबाट एकमुष्ट रूपमा संकलन हुने रकम प्रधानमन्त्री दैवी प्रकोप उद्धार कोषमा जम्मा गर्ने जनाएको छ ।
पालिकागत रूपमा सबैभन्दा धेरै रकम विराटनगरबाट संकलन भएको छ । विराटनगरका ३३ विद्यालयबाट २३ लाख १३ हजार ५ सय २७ रुपैयाँ संकलन भएको विवरणमा उल्लेख छ । सुन्दरहरैँचाका २५ विद्यालयबाट १५ लाख ७० हजार ३ सय १९ रुपैयाँ, बेलबारीका २० विद्यालयबाट ९ लाख ६५ हजार ३ सय ७२ रुपैयाँ र पथरीशनिश्चरेका २३ विद्यालयबाट ६ लाख ९० हजार ५ सय ४१ रुपैयाँ संकलन भएको छ ।
त्यस्तै, उर्लाबारीका १६ विद्यालयबाट ३ लाख ५३ हजार ३ सय १९ रुपैयाँ, रंगेलीका ११ विद्यालयबाट ४ लाख ५३ हजार ६ सय ३ रुपैयाँ, रतुवामाईका ११ विद्यालयबाट २ लाख ४६ हजार ४ सय ७७ रुपैयाँ र केराबारीका ६ विद्यालयबाट २ लाख ४१ हजार ४६ रुपैयाँ संकलन भएको छ ।
मिक्लाजुङका १० विद्यालयबाट १ लाख ९९ हजार ३३ रुपैयाँ, लेटाङका १२ विद्यालयबाट २ लाख ६६ हजार १३ रुपैयाँ, सुनवर्षीका एक विद्यालयबाट ६२ हजार ९ सय २५ रुपैयाँ, धनपालथानबाट २५ हजार २५ रुपैयाँ, कानेपोखरीबाट २५ हजार रुपैयाँ, ग्रामथानबाट १० हजार ९ सय रुपैयाँ र कटहरीका दुई विद्यालयबाट २७ हजार २ सय ३५ रुपैयाँ संकलन भएको विवरणमा उल्लेख छ ।
अध्यक्ष बस्नेतले विपद्बाट प्रभावित नागरिकलाई सहयोग गर्न विद्यालय परिवारले स्वतःस्फूर्त रूपमा रकम संकलन गरेको बताए । उनका अनुसार विद्यालयका सञ्चालक, शिक्षक, कर्मचारी, विद्यार्थी तथा अभिभावकको सहभागितामा संकलित रकमलाई केन्द्रीय राहत कोषमार्फत प्रधानमन्त्री दैवी प्रकोप उद्धार कोषमा पु¥याइनेछ ।
‘विपद्का बेला प्रभावित नागरिकलाई सहयोग गर्नु हाम्रो सामाजिक दायित्व हो । सदस्य विद्यालयबाट संकलित रकम केन्द्रीय राहत कोषमा पठाएका छौं,’ बस्नेतले भने, ‘प्याब्सनले देशभरबाट संकलन गरेको रकम एकमुष्ट रूपमा प्रधानमन्त्री दैवी प्रकोप उद्धार कोषमा जम्मा गर्नेछ ।’
भोटेकोशी नदीमा आएको बाढी तथा रसुवा, नुवाकोट, धादिङलगायत जिल्लामा विपद्बाट प्रभावित नागरिकको राहत तथा पुनःस्थापनामा सहयोग पु¥याउने उद्देश्यले प्याब्सनले राहत रकम संकलन गरेको हो ।
