पूर्वाञ्चल खबर
विराटनगर जुटमिल खेल मैदानमा आज भएको प्रतिस्पर्धात्मक खेलमा पुलिसले लेटाङलाई ४–३ गोल अन्तरले स्तब्ध बनायो । निर्धारित समयको खेल १–१ गोलको बराबरीमा सकिएपछि जितको छिनोफानो पेनाल्टीसुट आउटमाबाट गरिएको हो ।
पेनाल्टीसुट आउटमामा पुलिसका रमेश राजवंशी, सविन राई, हेम तामाङ र सञ्जीव लिम्बुले गोल गरे । पुलिसका समिर लिम्बुको प्रहार लेटाङका गोलरक्षक अमृत क्षेत्रीले बचाएका थिए । यता लेटाङका तर्फबाट निरज परियार, सुदिप श्रेष्ठ र सुलेन तामाङले मात्र गोल गर्न सके । लेटाङका सागर तिवारीको प्रहार बाहिरिएको थियो भने उमेश कार्कीको प्रहारलाई पुलिसका गोलरक्षक सचिन चौधरीले उत्कृष्ट बचाउ गर्दै टोलीको जित सुनिश्चित गरे ।
निर्णायक बचाउ गरेका पुलिसका गोलरक्षक चौधरी नै खेलको ‘प्लेयर अफ द म्याच’ घोषित भए । उनले नगद २१ सय रुपैयाँ पुरस्कार पाए । यसअघि खेलको दोस्रो मिनेटमै सञ्जय चौधरीको पासमा कृष्ण गुरुङले गोल गर्दै पुलिसलाई सुरुवाती अग्रता दिलाएका थिए । खेलको सुरुवातमै गोल खाएपछि दबाबमा परेको लेटाङले ३४ औं मिनेटमा बराबरी गोल फर्कायो । पृथ्वी चौधरीको पासमा अनुप मगरले गोल गर्दै खेललाई १–१ को स्थितिमा ल्याएका थिए । दुवै टोलीले थप अवसर सिर्जना गरे पनि गोल गर्न नसक्दा खेल टाइब्रेकरमा धकेलिएको थियो ।
हारसँगै साविक विजेता लेटाङ पहिलो खेलबाटै प्रतियोगिताबाट बाहिरिएको छ । प्रतियोगिता अन्तर्गत सोमबार सशस्त्र प्रहरी बल (एपीएफ) पकली सुनसरी र टिडब्लुसिवाइ विराटनगरबीच प्रतिस्पर्धा हुने आयोजकले जनाएको छ ।
