पूर्वाञ्चल खबर
आज बिहान करिब २ः४५ बजेतिर बर्जु–३ खरीटोलदेखि करिब ८ सय मिटर दक्षिण भारततर्फ पर्ने सीमाक्षेत्रमा सशस्त्र प्रहरीको मोबाइल गस्ती टोलीले शंकास्पद गतिविधि देखेपछि निगरानी बढाएको थियो । त्यस क्रममा केही व्यक्तिहरूले टाउकोमा बोकेर नेपालबाट भारततर्फ गाँजा लैजाँदै गरेको देखिएपछि प्रहरी टोली नजिकिएको थियो ।
प्रहरीको उपस्थिति महसुस हुनेबित्तिकै ती व्यक्तिहरू अँध्यारोको मौका छोप्दै सामान छोडेर फरार भएका थिए । घटनास्थलबाट ६ वटा पोका बनाएर तयारी अवस्थामा राखिएको करिब १६० किलो गाँजा बरामद गरिएको सशस्त्र प्रहरीले जनाएको छ ।
सशस्त्र प्रहरी बल, नेपाल सीमा सुरक्षा गुल्म कप्तानगंज र बीओपी अमडुवाबाट खटिएको संयुक्त टोलीले उक्त लागूऔषध नियन्त्रणमा लिएको हो । बरामद गाँजा हाल बीओपी अमडुवामा राखिएको छ ।
सशस्त्र प्रहरी बल सुनसरीका प्रमुख एसपी श्यामकुमार कार्कीका अनुसार घटनामा संलग्न व्यक्तिहरूको खोजी तीव्र पारिएको छ । सीमावर्ती क्षेत्रमा लागूऔषध तस्करी नियन्त्रणका लागि गस्ती र निगरानी थप सुदृढ गरिएको उनले बताए ।
