पूर्वाञ्चल खबर
आज विराटनगरको महेन्द्र चोकमा प्याब्सन मोरङसहित पाँच संगठनले आयोजना गरेको जिल्लाव्यापी बृहत खबरदारी सभामा बोल्दै उपाध्यक्ष ढकालले आगामी भदौ २६ गते विधेयकमाथि छलफल हुने भएकाले त्यसअघि नै निजी क्षेत्रका मागहरू सम्बोधन गरिनुपर्ने बताए। ‘अझै पनि संशोधन गर्ने समय पर्याप्त छ,’ उनले भने, ‘भदौ २६ गतेभन्दा अगाडि निजी क्षेत्रको माग सरकारले सुनुवाइ गरेर लगानीमैत्री वातावरण तय गर्नुपर्नेछ।’
ढकालले निजी क्षेत्रको पाँचबुँदे माग पूरा हुनुपर्ने मान्यताका साथ आफूहरू सडकमा आएको स्पष्ट पारे। ‘हामीले अहिले विद्यालयहरूमा बालबालिकाहरूलाई पठनपाठन गराउँदै आएका छौं। बन्द हड्तालसम्म पुग्ने हाम्रो उद्देश्य छैन,’ उनले भने, ‘तर, सरकारले हाम्रो माग पूरा गरेन भने भदौ १८ गतेदेखि देशभरका संस्थागत विद्यालय ठप्प पार्नेछौं।’ उनले राजनैतिक दलहरूले समेत विद्यालयलाई शान्ति क्षेत्र घोषणा गरिनुपर्दछ भनिरहेका बेला सरकारले निजी क्षेत्रलाई निरुत्साहित गर्ने गरी विधेयक ल्याउनु दुर्भाग्यपूर्ण भएको बताए। विद्यार्थीको पठनपाठन बन्द नहुने गरी सरकारले निजी क्षेत्रको माग सुनुवाइ गरेर अहिले संस्थागत विद्यालय बन्द हुने गरी आएको शिक्षा विधेयक सच्याउनुपर्नेमा उनले जोड दिए।
