खबर पूर्वाञ्चल
विश्व शान्ति मानव एकता र जिवित प्राणीहरूको रक्षार्थ यस वर्षको उभौली पर्व अमेरिकामा विविध सांस्कृतिक कार्यक्रमको आयोजना गरि आइतवार मनाईको हो ।
किराँत कल्चरल सोसाइटी अफ फिर पिट्सवर्क अमेरिकाले विभिन्न जात–जाती र संघ संस्थाको सहभागितामा सांस्कृतिक कार्यक्रमको आयोजना गरि २०८२ सालको उभौली पर्व मनाएको हो । उभौली पर्वको अवसरमा विश्व शान्ति, मानव एकता र जिवित प्राणीहरुको रक्षार्थ पुजाआजा गरि कार्यक्रम मनाइएको थियो ।
कार्यक्रममा पिट्सवर्क शहरमा रहेको नेवार समाज, गुरुङ, बुद्धिष्ट कम्युनिटी, किरात राई यायोक्खा, हिमालय फाउण्डेसन, ओमकार परिवार, तामाङ समाज तथा आयोजक कमिटीको तर्फवाट विभिन्न जातीय तथा परम्परागत सांस्कृतिक नृत्य र गितहरू प्रस्तुत गरिएको थियो ।
कार्यक्रममा नेपाली सांगितिक रियालिटी सो ‘द भ्वाइस अफ लिड्स सिजन–३ ’ की विजेता अनुया तामाङले पनि विभिन्न गित प्रस्तुत गरेकी थिइन । कार्यक्रमका प्रमुख अतिथि केसी ओएका नरेश लावती र विशेष अतिथि मिरा लोहरुङ रहेका थिए।
कार्यक्रम सोसाइटीका अध्यक्ष जीवन सुब्बाको सभापतित्वमा सम्पन्न भएको थियो । कार्यक्रमको सञ्चालन सागर मुकारुङ, राधा राई र पुनम राइले गरेका थिए।
