खबर पूर्वाञ्चल
आज विराटनगर स्थित दिल्ली पब्लिक स्कूलको मैदानमा कोशी प्रदेशस्तरीय कराँते प्रतियोगिताको उद्घाटन गर्दै सदस्य सचिव बस्नेतले खेलकुद क्षेत्रमा दादागिरी गर्ने , अराजकता मच्याउनेले खराव अभिप्रायले महोत्सवलाई विवादमा पार्न खोजेको बताएका हुन्।
बस्नेतले नेपाल कराँते महासंघको विधानले प्रदेशस्तरको कमिटीलाई मात्रै मान्यता दिएको बताउँदै विधानमा हुँदै नभएको जिल्ला कमिटीले आफ्नो अस्तित्वको दाबी गर्नु कानून सम्मत नभएको समेत स्पष्ट पारे। उनले कराँते महासंघ हालसम्म कोशी प्रदेशको खेलकुद संघ र संस्था मार्गदर्शन मातहत दर्ता समेत नभएको र विधानमा समेत जिल्ला संरचनाको अस्तित्व नभएको हुँदा आफैले जिल्ला संघको घोषणा गरेर चिठी लेख्दैमा खेलकुद बोर्ड र मातहतको जिल्ला खेलकुद विकास समितिले समेत मान्यता प्रदान नगर्ने जानकारी गराए।
बस्नेतले खेलकुद क्षेत्रमा आराजकता मच्याउने खोज्नेहरुको कानुनी उपचारका लागि प्रदेशका मुख्यमन्त्री , सामाजिक विकास मन्त्री र राष्ट्रिय खेलकुद परिषद्का सदस्य सचिवसँग सल्लाह गरिरहेको बताए।
कराँते प्रतियोगिताको उद्घाटन समारोहको कोशी प्रदेश सभा सदस्य भीम पराजुलीले आफूले महानगरको प्रमुख हुँदा पाँचौ साफ महिला फुटबल विराटनगरमा आयोजना गर्न सफल भएको स्मरण गर्दै प्रदेश खेलकुद महोत्सवलाई आफ्नो सम्पूर्ण सहयोग हुने प्रतिवद्धता व्यक्त गरे। पराजुलीले समाजमा देखा परेको नकारात्मकतालाई खेलकुदको माध्यमबाट परास्त गर्न सकिने धारणासमेत व्यक्त गरे।
महोत्सव अन्तर्गतको कराँते प्रतियोगिताको विभिन्न विधामा कोशी प्रदेशका १४ वटै जिल्लाका खेलाडीहरु सहभागिता रहेको छ।
