कोशी प्रदेश ट्रफी क्रिकेटको टेलिभिजन एकाधिकार विराटनगरको मकालु टेलिभिजनलाई

मोरङ जिल्ला क्रिकेट संघद्धारा विराटनगरमा आयोजित टेलिभिजन प्रसारणसम्बन्धी पत्रकार सम्मेलनका क्रममा संघका अध्यक्ष मोहम्मद साद कुरैसीले पहिलो खेलमा गृह प्रदेशको चुनौति कर्णालीले सामना गर्ने बताए । तीन विभागिय टोली र सात प्रदेशको सहभागिता हुने प्रतियोगिता फागुन २२ देखि चैत्र ३ गते आयोजना हुने अध्यक्ष कुरैसीले जानकारी दिए । विजेता टोलीले ५ लाख रुपैया हात पार्ने प्रतियोगिताको समूह ‘क’ मा सशस्त्र प्रहरी बलको टोली, त्रिभुवन आर्मी क्लब, कोशी प्रदेश, मधेश प्रदेश र कर्णाली प्रदेश रहने जानकारी दिए । त्यसैगरि, समूह ‘ख’ मा नेपाल पूलिस क्लब, बागमती प्रदेश, गण्डकी प्रदेश, लुम्बिनी प्रदेश, र सूदुरपश्चिम प्रदेश रहनेछन् ।

पत्रकार सम्मेलनका क्रममा संघका अध्यक्ष कुरैसीले प्रतियोगिताको टेलिभिजनको एकाधिकार विराटनगरको मकालु टेलिभिजनले पाएको बताए । उनले भने, ‘प्रदेशस्तरीय राष्ट्रिय प्रतियोगिता आफैमा उत्सव हो । प्रतियोगितालाई राष्ट्रसामू भव्य र सभ्य बनाउने अहम हात सञ्चार क्षेत्रको हुने हुदाँ सबैले साथ सहयोग गर्नुहुने अपेक्षा गर्दछु ।’ टेलिभिजन प्रसारणमा मकालु जोडिएको बताएका अध्यक्ष कुरेसीले प्रतियोगितामा पत्रकार र सञ्चारसंग जोडिएका अन्य पाटो आयोजक संस्थाले नै ब्यहोर्ने प्रस्टाए । उनले भने, ‘ प्रतियोगिता सफल बनाउन मिडियाको सहयोग आवश्यक छ । मिडियालाई हामीले कार्डदेखि वाईफाईको अन्य सुविधा उपलब्ध गराउनेछौ ।’

त्यसैगरि, मकालु टेलिभिजनका प्रमुख कार्यकारी अधिकृत दिवस सुवेदीले प्रदेशको खेल क्षेत्रलाई घर घरमा पुराउनका लागि टेलिभिजनले सक्दो प्रयास गर्ने बताए । आर्थिक रुपमा भन्दापनि क्रिकेटलाई प्रवद्र्धन गर्नका लागि आफनो स्थानबाट प्रयास गरिएको अधिकृत सुवेदीले बताए । उनले भने, ‘यही प्रत्यक्ष प्रसारणका लागि बाहिरको प्राविधीक ल्याउदाँ ठूलो रकम खर्च हुने उहाँहरुले बताएपछि हामी नै अघि सरेका हौ । विगतमा फुटबल र क्रिकेटको प्रसारण गरेको अनुभवलाई थप मजबुत बनाउँदै प्रतियोगिता सफल बनाउनेतर्फ केन्द्रित भएकाछौ ।’ उनले प्रत्यक्ष प्रसारणसंगै दैनिक रुपमा भिडियो क्लिप आवश्यक सबै सञ्चार क्षेत्रलाई उपलब्ध गराउने जानकारी दिए ।

दैनिक २ वटा खेल हुने प्रतियोगितामा पहिलो खेल विहान १० बजे र दिउँसो २ बजे हुने बताइएको छ ।