विराटनगर / कोशी प्रदेशको मुख्यमन्त्रीमा केदार काकीको नाम पार्टीका केन्द्रीय सभापति शेरबहादुर देउवासँग पटक पटक छलफलका आधारमा निर्णय भएको नेपाली कांग्रेसका केन्द्रीय सदस्य डा. शेखर कोइरालाले बताएका छन् ।
आज साँझ विराटनगर विमानस्थलमा सञ्चारकर्मीहरुसँग कुरा गर्दै उनले सो कुरा बताएका हुन् । नेता कोइरालाले कोशी प्रदेशको परिस्थित भिन्न रहेको एवं जनतामा रहेको दुविधा अन्त्य गर्नु पर्ने आवश्यक्त्ताले कार्कीको नेतृत्वमा प्रदेश सरकार निर्माण गरिएको बताए ।
नेता कोइरालाले प्रदेश सरकार निर्माणले सङ्घीय र बागमतीको सरकारलाई कुनै असर नपार्ने समेत बताए । कोशी प्रदेश सरकारमा अहिले सहभागी दलले निरन्तरता पाउने बताउँदै नेता कोइरालाले तिहार अगाडि सरकारको आवश्यक्त्ता अनुसार विस्तार हुने बताए ।
नेता कोइरालाले संसदीय व्यवस्थामा प्रधानमन्त्रीलाई संसद विघटनको अधिकार संविधानमा नराख्नु ठूलो गल्ती भएको बताए । उनले आफु प्रधानमन्त्री बन्नका लागि अहिले आवश्यक संसद सदस्य सङख्या अपुग रहेको र समय आएपछि सङ्घीय सरकारको नेतृत्व परिवर्तन हुन सक्ने बताए ।
