विराटनगर / झण्डै तीन अर्बको लगानीमा विराटनगर विमानस्थलको नयाँ टर्मिनल भवन निर्माण सुरू भएको छ । टर्मिनल भवनको आज पर्यटन मन्त्री सुदन किराँतीले शिलान्यास गरेसँगै निर्माणको प्रक्रिया सुरू भएको हो ।

उक्त टर्मिनल भवन भ्याटबाहेक २ अर्ब ४२ करोड ८ लाख ५६ हजार लागतमा निर्माण सुरु भएको हो । १८ सय यात्रु क्षमताको टर्मिनल भवन निर्माणका लागि केसी– डाँफे जेभी निर्माण कम्पनीले गत मंसिर ११ गते ठेक्का सम्झौता गरेको छ । मुलुकमा नवनिर्मित पोखरा र गौतम बुद्ध अन्तर्राष्ट्रिय टर्मिनल भवनभन्दा ठूलो १६ हजार २७७ दशमलव ८३ वर्गमिटरमा उक्त टर्मिनल भवन निर्माण सुरु भएको नागरिक उड्डयन प्राधिकरणका महानिर्देशक इन्जिनियर प्रदीप अधिकारीले जानकारी दिए । उनका अनुसार पोखरा अन्तर्राष्ट्रिय विमानस्थलको टर्मिनल भवन १५ हजार वर्ग मिटरको छ । गौतमबुद्ध विमानस्थलको टर्मिनल भवन पनि १४ हजार वर्ग मिटरको छ । विमानस्थलको दिर्घकालिन विकासका लागि देशकै ठूलो टर्मिनल भवन निर्माण गर्न लागिएको उनले बताए । विराटनगरमा बन्दै गरेको टर्मिनल भवन आन्तरिक तर्फ देशकै ठुलो भएको बताइएको छ ।

तीन वर्ष भित्र टर्मिनल भवन निर्माण पुरा गरिसक्नुपर्नेछ । यसअघि २०२५ साल असार ९ गते विराटनगर विमानस्थलको टर्मिनल भवन निर्माण भएको थियो । ५० वर्ष पुरानो भवन विस्थापित गरेर नयाँ अत्याधुनिक टर्मिनल भवन बन्न लागेको हो ।

टर्मिनल भवनमा १७ वटा टिकट काउन्टर, २४ वटा पसल, ४ वटा रेष्टुरेन्ट, पत्रकार सम्मेलन कक्ष, ३ वटा भीआईपी कक्ष, बालबालिका खेल्ने, प्राथना कक्ष, स्तनपान कक्ष, ४ वटा प्राइभेट कक्ष, हललगायतको अत्याधुनिक सुविधा रहने छन् ।

यसअघि १३ अर्बको गुरुयोजना निर्माण गरी विराटनगर विमानस्थललाई अन्तर्राष्ट्रिस्तरको विमानस्थलको रुपमा विस्तारका लागि तीन तहको सरकारबीच सम्झौता भएर जग्गा अधिग्रहण प्रक्रिया सुरु भएको थियो । मन्त्रिपरिषद्को २०७७ कात्तिक २७ गतेको निर्णयले १२६ दशमलव ४६ बिघा जग्गा अधिग्रहण गर्ने निर्णय अनुसार जिल्ला प्रशासन मोरङ र सुनसरीले जग्गाधनीहरुलाई मुआब्जा वितरणका लागि सार्वजनिक सूचनासमेत सार्वजनिक गरिसकेका थिए । तर अघिल्ला संघीय सरकारले मुआब्जा वितरणका लागि बजेट बिनियोजन नगरेपछि जग्गाधनीको दवावमा मन्त्रिपरिषद्को गत भदौ ३१ गतेको निर्णयले अघिल्लो निर्णय फिर्ता लिएका थिए ।

तत्कालीन संस्कृति, पर्यटन तथा नागरिक उड्डयनमन्त्री योगेश भट्टराई, प्रदेश १ का मुख्यमन्त्री शेरधन राई, विराटनगर महानगर प्रमुख भीम पराजुलीलगायतको उपस्थितिमा नागरिक उड्डयन प्राधिकरण, प्रदेश सरकार र विराटनगर महानगरबीच त्रिपक्षीय सम्झौता भएको थियो । विमानस्थलको हाल रहेको एक हजार पाँच सय मिटर लम्बाईको धावनमार्गलाई तीन हजार मिटरमा बिस्तार गर्न सम्झौता गरेको थियो । विमानस्थल बिस्तारका लागि आवश्यक जग्गा अधिग्रहणका लागि संघीय सरकारले ५०, प्रदेश सरकारले ४० र विराटनगर महानगरपालिकाले १० प्रतिशत लागत साझेदारी गर्ने सम्झदारी पत्रमा उल्लेख थियो ।

विराटनगर विमानस्थलबाट हाल यति एयरलायन्सको ४, बुद्ध एयरलायन्सको ७, सौर्यको २ र श्री एयरलायन्सको ३ गरी दैनिक १६ वटा उडान भइरहेको छ

पुरानो टर्मिनल भवन भएको स्थानमा भने पार्किङ स्थल बनाउने तयारी छ । विमानस्थलको टर्मिनल भवनको शिलन्यास गर्दै संस्कृति पर्यटन तथा नागरिक उड्डयन मन्त्री सुधन किराँतीले नयाँ बन्ने टर्मिनल भवनले प्रदेश १ को विकासमा कोशेढुङ्गा सावित हुने बताए । उनले ठेकेदारलाई समयमा नै काम सम्पन्न गर्न निर्देशन दिए ।

‘कुनै पनि काम सुरु गर्नु ठूलो कुरा हो । त्यसो भन्दा पनि ठूलो कुरा समयमै सम्पन्न गर्नु हो । समयमै सम्पन्न गरी गुणस्तरीय काम हुनुपर्दछ,’ मन्त्री किराँतीले भने । नयाँ बन्ने सुविधा सम्पन्न टर्मिनल भवन सहज तरिकाले देश र जनताको पक्षमा गर्नुपर्ने उनले बताए ।