वडागत मेलमिलापकर्ताहरुको क्षमता अभिवृद्धिसम्बन्धी तालिम सुरु

खबर पूर्वाञ्चल, २१ पुष २०७९, बिहीबार १७:२९
189
Shares

विराटनगर / विराटनगर महानगरपालिकाको न्यायिक समितिको आयोजनामा आजदेखि वडागत मेलमिलापकर्ताहरुको क्षमता अभिवृद्धिसम्बन्धी तालिम सुरु भएको छ ।

तालिमको विराटनगर महानगरपालिकाका मेयर नागेश कोइरालाले उद्घाटन गरे । उद्घाटन समारोहलाई सम्बोधन गर्दै मेयर कोइरालाले आएका उजुरीलाई महानगरमै समाधान गर्नुपर्नेमा जोड दिए । मेयर कोइरालाले विराटनगरलाई नेपालमै सबैभन्दा उत्कृष्ट न्याय सम्पादन गर्ने महानगरका रुपमा स्थापित गराउन आग्रह गरे ।

न्यायिक समितिकी संयोजकसमेत रहेकी उपमेयर शिल्पा निराला कार्कीले महानगरले अन्यायमा परेकाहरुलाई न्याय दिलाउने बताइन् । उनले मेलमिलापकर्ताका माध्यमबाट वास्तविक अन्यायमा परेकाको पहिचान पनि हुने उल्लेख गरिन् । समितिका सदस्य तीर्थेन्द्र न्यौपानेले गाउँघरमा झैझगडा भइहाले मेलमिलापकर्तामार्फत मिलाउन सकियोस् भनेर तालिम आयोजना गरिएको जानकारी दिए । उनले तीन चरणमा तालिम सञ्चालन हुने बताए ।

आजैदेखि ७ दिनसम्म सञ्चालन हुने तालिममा न्यायाधीश राजेश कटवाल, अधिवक्ता कला त्रिताल, राजकिरण पौडेल, सरिता अधिकारी, आन्तरिक मामिला तथा कानुन मन्त्रालयका सचिव उमेश बस्नेतले प्रशिक्षण दिने महानगरकी कानुन अधिकृत शारदा थपलियाले जानकारी दिइन् । पहिलो चरणमा १ देखि ६ नम्बर वडाका ६–६ जनाका दरले तालिममा सहभागी हुनेछन् । त्यसैगरी दोस्रो चरणमा ७ देखि १२ र तेस्रो चरणमा १३ देखि १९ वडालाई समेटेर तालिम दिइनेछ । हरेक वडाबाट ६ जना मेलमिलापकर्तालाई सहभागी गराइनेछ । पहिलो चरणको तालिममा ३६ जना मेलमिलापकर्ता सहभागी भएका छन् ।

यो खबर पढेर तपाईलाई कस्तो महसुस भयो ?

तपाईको प्रतिक्रिया

*

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक:
पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: khabarpurwanchal6600@gmail.com
सम्पादक – डिल्ली पोखरेल, ९८५२०२२३९२
सुचना तथा प्रसारण विभाग दर्ता नं. ०७५७/०७४/७५