कोरोना संक्रमणबाट पाँच दिनको फरकमा मोरङको उर्लाबारीमा बाबु छोराको निधन

उर्लाबारी–२ का उर्लाबारीका पूर्व गाविस उपाध्यक्ष कुमार धिमालको निधन भएको पाँच दिनपछि उनका उनका ४७ वर्षीय छोरा तेजबहादुर आज निधन भएको छ ।

उर्लाबारी गाविसका २०५४ साल देखि २०५८ सालसम्म उपाध्यक्ष रहेका धिमालको जेठ १२ गते कोभिडको संक्रमणका कारण झापाको विर्तामोडस्थित बिएण्डसी अस्पतालमा मृत्यु भएको थियो । उनका छोराको पनि आज सोही अस्पतालमा उपचारका क्रममा निधन भएको उर्लाबारी नगरपालिका स्वास्थ्य शाखाले जनाएको छ ।

धिमाल जाति विकास केन्द्रका केन्द्रीय महासचिव मातृका धिमालका अनुसार परिवारका जेठो छोरा तेजबहादुरमा सबैभन्दा पहिले कोरोना देखिएको थियो । उनलाई अस्पताल भर्ना गरेको एक सातापछि बाबु कुमारमा संक्रमण देखिएको थियो ।

धिमाल संस्कृति अनुसार बाबुको दाहसंस्कार भएको स्थल स्थानीय सालबारी बन क्षेत्रमै छोराको पनि अन्तेष्टी गर्ने तयारी भईरहेको छ । योसँगै उर्लाबारीमा कोभिडका कारण ज्यान गुमाउनेको संख्या १८ पुगेको छ ।