विराटनगरका ४ सहित मोरङमा आज थप १० जनाको मृत्यु

खबर पूर्वाञ्चल, १३ जेष्ठ २०७८, बिहीबार १६:०१

विराटनगर / विराटनगरका ४ सहित मोरङमा आज विहान १० जना कोरोना सङ्क्रमित मृत्यु भएको छ ।

मोरङको विभिन्न चारवटा अस्पतालमा उपचारका क्रममा आज विहानभरमा चार महिला र छ जना पुरुषको मृत्यु भएको हो ।

विराटनगरको नोबेल शिक्षण अस्पतालमा ५ जना,मोरङको बूढीगङ्गा गाउँपालिकास्थित विराट शिक्षण अस्पताल र विराटनगरको कोशी अस्पताल कोभिड उपचार युनिटमा २–२ जना कोशीकै कोभिड–१९ उपचार केन्द्रमा १ जनाको मृत्यु भएको छ ।

मृत्यु हुनेमध्ये छ जनाको मोरङका हुन् । तीमध्ये ४ जना विराटनगर र केराबारी तथा मिक्लाजुङका १–१ जना रहेका छन् ।

विराट शिक्षण अस्पतालमा विराटनगर महानगरपालिका–६ की ४८ वर्षीया महिलाको विहान ५ः३५ बजेतिर मृत्यु भएको छ । विराटका कोभिड अस्पताल इन्चार्ज सुनील देवका अनुसार परीक्षण गराउँदा सङ्क्रमण पुष्टि भएकी महिलालाई उपचारका लागि जेठ ३ गते भर्ना गरिएको थियो ।

सुनसरीको गढी गाउँपालिका–३ का ६५ वर्षीया वृद्ध पुरुषको पनि विहानका लागि १२ः२० बजेतिर मृत्यु भएको जानकारी देवले दिए । उनका अनुसार वृद्धलाई उपचारका लागि जेठ १० गते अस्पताल भर्ना गरिएको थियो ।

कोशी अस्पतालको कोभिड उपचार युनिटमा विराटनगर–१० का ६५ वर्षीया वृद्ध पुरुषको आज विहान ५ बजेतिर मृत्यु भएको छ । अस्पतालका मेडिकल सुपरिटेन्डेन्ट डा. चुमनलाल दासका अनुसार वृद्धलाई उपचारका लागि जेठ ६ गते भर्ना गरिएको थियो ।

त्यस्तै सुनसरीको बर्जु गाउँपालिका–४ की ७० वर्षीया वृद्धा महिलाको पनि कोशीमै मृत्यु भएको छ । जेठ ८ गते उपचारका लागि भर्ना गरिएकी वृद्धाको उपचारका क्रममा विहान ४ बजेतिर मृत्यु भएको जानकारी डा. दासले दिए ।

कोशी अस्पतालकै कोभिड–१९ उपचार केन्द्रमा विराटनगर–३ की ५६ वर्षीया महिलाको विहान ४ः४० बजेतिर मृत्यु भएको छ । कोरोना पुष्टि भएकी महिलालाई जेठ ५ गते उपचारका लागि भर्ना गरिएको केन्द्रका सूचना अधिकारी अनुपम राजवंशीले जानकारी दिए ।

नोबेलमा विराटनगर महानगरपालिका–६ का ४५ वर्षीया पुरुषको मृत्यु भएको छ । अस्पतालका प्रबन्धक नारायण दाहालका अनुसार उपचारका लागि जेठ ४ गते भर्ना गरिएका पुरुषको विहानका राति १२ः१५ बजेतिर मृत्यु भएको हो ।

मोरङको मिक्लाजुङ गाउँपालिका–९ का ६० वर्षीया पुरुषको विहान ८ः१५ बजेतिर मृत्यु भएको छ । उनलाई पनि उपचारका लागि जेठ ४ गते नै भर्ना गरिएको थियो ।

दाहालका अनुसार मोरङको केराबारी गाउँपालिका–७ का ८४ वर्षीया वृद्धा महिलाको विहान ५ः३० बजेतिर मृत्यु भएको छ । कोरोना पुष्टि भएकी वृद्धालाई उपचारका लागि बुधबार भर्ना गरिएको थियो । उपचार सुरु गरिएको २४ घण्टा पनि बित्न नपाउँदै वृद्धाको मृत्यु भयो ।

सुनसरीको इटहरी उपमहानगरपालिका–१७ का ५५ वर्षीया पुरुषको विहानका लागि १ः३० बजेतिर मृत्यु भएको छ । उनलाई उपचारका लागि जेठ १० गते अस्पताल भर्ना गरिएको जानकारी दाहालले दिए ।

उनका अनुसार सप्तरी घर भएका ३४ वर्षीया पुरुषको पनि नोबेलमै मृत्यु भएको छ । उनलाई उपचारका लागि वैशाख २७ गते अस्पताल भर्ना गरिएको दाहालले बताए । उपचाररत पुरुषको विहान ५ बजेतिर मृत्यु भएको हो ।

यो खबर पढेर तपाईलाई कस्तो महसुस भयो ?

तपाईको प्रतिक्रिया

*

MADHAV RAJ WAGLE
PABSON daisain

खबर पूर्वाञ्चल

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक:
पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: pushpa.biratnagar@gmail.com
सम्पादक – डिल्ली पोखरेल, ९८५२०२२३९२
सुचना तथा प्रसारण विभाग दर्ता नं. ०७५७/०७४/७५