जसपाको नेतृत्वमा सरकार बनाउन पहल गर्न नसक्नु कांग्रेसको कमजोरी हो : शेखर कोइराला

कोरोना रोकथाम र नियन्त्रणमा सरकार असफल
खबर पूर्वाञ्चल, २ जेष्ठ २०७८, आईतवार १६:०९

विराटनगर /नेपाली कांग्रेसका प्रभाशाली नेता डा. शेखर कोइरालाले वर्तमान सरकारलाई विस्थापित गरेर जनता समाजवादी पार्टीको नेतृत्वमा सरकार बनाउन पहल गर्न नसक्नु कांग्रेसको कमजोरी रहेको बताएका छन् ।

आज विराटनगरस्थित कोइराला निवासमा संवाददातासँग कुरा गर्दै नेता कोइरालाले सो कुरा बताएका हुन् । “पुस ५ को कदमलाई कांग्रेसले असंवैधानिक र अलोकतान्त्रिक भनिसकेकाले उसले यो सरकारलाई जसरी पनि विस्थापित गर्नुपथ्र्यो,” उनले थपे, “त्यसका लागि प्रधानमन्त्री केपी शर्मा ओलीले संसदबाट विश्वास गुमाएको अवस्थामा कांग्रेसको नेतृत्वमा सरकार नबन्ने भएपछि जनता समाजवादी पार्टीको नेतृत्वमा सरकार बनाउन पहल नगर्नु कांग्रेसको कमजोरी हो ।”

नेता कोइरालाले प्रधानमन्त्री ओलीको पुस ५ को कदमपछि राजनीतिक दलहरूमा धु्रवीकरण बढेको उनको टिप्पणी थियो । उनले दलहरूबीच धु्रवीकरण बढ्दा लोकतन्त्र नै कमजोर बन्ने अवस्था आएको सुनाए । “पुस ५ पछि दलहरूबीच तीव्र धु्रवीकरण भयो, सत्तारुढमा मात्रै नभएर प्रतिपक्ष दलमा पनि धु्रवीकरण देखियो,” कोइरालाले भने, “कांग्रेसमै पनि एउटा पक्ष चुनावमा जानुपर्छ भन्ने थियो भने अर्को पक्ष संसद पुनःस्थापना हुनुपर्छ भन्ने थियो ।”

नेता कोइरालाले कोरोना रोकथाम र नियन्त्रणमा सरकार असफल भएको समेत टिप्पणी गरेका छन् । सत्तारुल दलभित्रको आन्तरिक किचलोमा सरकार रुमलिँदा कोरोनाको संक्रमण भयावह रूपमा फैलिएको आरोप लगाए । “कोभिड–१९ को रोकथाम र नियन्त्रणमा सरकारले योजनाबद्ध रूपमा काम गर्न नसकेकै हो, उनले भने, “सीमा नाकामा समयमै होल्डिङ सेन्टर निर्माण, अक्सिजनको जोहो, आइसोलेसन निर्माणलगायतमा सरकार गम्भीर देखिएन ।”

नेता कोइरालाले कोरोनाविरुद्धको लडाइँमा विगतमा भएका कमजोरीबाट पाठ सिकेर तत्काल खोप खरिद गर्न सरकारलाई सुझाव दिए । उनले विकास निर्माणको खर्च कटौती गरेर तत्काल खोप खरिद गर्नुपर्नेमा जोड दिए । नेता कोइराला भन्छन्, “सरकारको पहिलो कर्तव्य भनेकै जनता बचाउनु हो, जनता बचाउनका लागि अनुदानमा होइन विकास खर्च कटौती गरेर भए पनि खोप गरिद गर्नुपर्छ ।”नेता कोइरालाले अमेरिका, रुस, चीन, भारत जहाँबाट भए पनि जतिसक्दो चाँडो खोप खरिद आवश्यक रहेको उल्लेख गरे । उनले भने, “उत्पादक राष्ट्रसँग सिधै सम्पर्क गरेर खोप किनेर जनतालाई लगाउनुको विकल्प छैन ।” खोप नलगाएका भन्दा लगाएकामा संक्रमणको जोखिम कम भएको उनले बताए ।

नेता कोइरालाले स्थानीय, प्रदेश र संघीय तीनै तहको सरकार मिलेर युद्धस्तरमा अस्थायी अस्पताल बनाउनु आवश्यक रहेको औंल्याए । उनले वडा तहसम्मै आइसोलेसन बनाउनुपर्नेमा समेत जोड दिए । अक्सिजन प्लान्ट र अक्सिजनको जोहो गरेर वितरण प्रणालीलाई समेत व्यवस्थित बनाउन उनले आग्रह गरे । अस्पतालहरूले १५ दिनभित्र अक्सिजन प्लान्ट स्थापना गर्न सम्भव नभएको उनको भनाइ थियो ।

यो खबर पढेर तपाईलाई कस्तो महसुस भयो ?

तपाईको प्रतिक्रिया

*

खबर पूर्वाञ्चल

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक:
पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: pushpa.biratnagar@gmail.com
सम्पादक – डिल्ली पोखरेल, ९८५२०२२३९२
सुचना तथा प्रसारण विभाग दर्ता नं. ०७५७/०७४/७५