सवारी दुर्घटनाबाट मोरङमा दुई जनाको मृत्यु, पाँच जना घाइते

मोरङको बेलबारी, पथरीशनिश्चरे र उर्लाबारीमा सोमबार साँझ सवारी दुर्घटना भएको थियो । मोरङ बेलबारी हिजो साँझ साढे ५ बजे मोटरसाईकल दुर्घटनामा परि बेलबारी–७ का ३७ बर्षीय नविन पौडेलको मृत्यु भएको छ । बेलबारी–४ स्थित राजमार्गमा बिपरित दिशाबाट आएका १–०२–०४२ प ४२१६ नम्बरको मोटरसाईकल र को ३९ प ३८०१ नम्बरको मोटरसाईकल एक आपसमा ठक्कर खाई दुर्घटना हुँदा को ३९ प ३८०१ नम्बरको मोटरसाईकल चालक नविन पौडेल गम्भिर घाईते भएका थिए । गम्भिर घाईते भएका पौडेलको न्युरो अस्पताल विराटनगरमा उपचारको क्रममा बेलुका ७ बजे मृत्यु भएको जिल्ला प्रहरी कार्यालय मोरङले जनाएको छ ।

दुर्घटनामा अर्को मोटरसाइकलका चालक सुनसरीको धरान उपमहानगरपालिका–१७ का २० वर्षीय प्रमोद राई र पछाडि सवार २१ वर्षीय विपिन श्रेष्ठ गम्भीर घाइते भएका छन् । हात, खुट्टा र शरीरका विभिन्न भागमा चोट लागेका दुवै जनाको बीपी कोइराला स्वास्थ्य विज्ञान प्रतिष्ठान धरानमा उपचार भइरहेको मोरङ प्रहरीले जनाएको छ ।

यसै गरी मोरङ पथरी शनिश्चरे–२ स्थित राजमार्गमा हिजो बेलुका ७ बजे बसको ठक्करबाट मोटरसाईकल चालक झापा मेची नगरपालिका ९ का ३२ बर्षीय मुकेशप्रसाद पौडेलको मृत्यु भएको छ । को १ ख ६८३१ नम्बरको बसले मे ८ प ६३७७ नम्बरको मोटरसाईकललाई ठक्कर दिँदा मोटरसाईकल चालक पौडेल गम्भिर घाईते भएका थिए । गम्भिर घाईते भएका पौडेलको पथरी अस्पतालमा उपचारको क्रममा मृत्यु भएको जिल्ला प्रहरी कार्यालय मोरङले जनाएको छ । ठक्कर दिने बस र चालक संजय साह नियन्त्रणमा रहेको मोरङ प्रहरीले जनाएको छ ।

तयस्तै मोरङको उर्लाबारी नगरपालिका–८ स्थित भित्री सडक खण्डमा दक्षिणबाट उत्तरतर्फ आउँदै गरेको नम्बर नखुलेको अटो टेम्पोले दक्षिणतर्फ जाँदै गरेको को १२ प १२५१ नम्बरको मोटरसाइकललाई ठक्कर दिँदा हिजो राति ८ः१० बजेतिर दुर्घटनामा परेर मोटरसाइकल चालक मोरङको रतुवामाई नगरपालिका–५ का ३५ वर्षीय भोजकुमार खड्का र पछाडि सवार ३४ वर्षीय प्रकाश माझी घाइते भएका छन् । घाइतेमध्ये खड्काको अवस्था गम्भीर छ । दुवै घाइतेको गोदावरी अस्पताल उर्लाबारीमा उपचार भइरहेको छ । दुर्घटनापछि फरार भएको अटोको खोजी भइरहेको प्रहरीले जनाएको छ ।