भारतीय प्रधानमन्त्री मोदीको विराटनगरमा पुत्ला दहन(फोटो फिचर)

कोरोना भाइरस रोकथाम र नियन्त्रणको लागि विश्व लकडाउन भएको मौका छोप्दै लिपुलेकमा शुक्रबार भारतले नयाँ सडक निर्माण गरी उद्घाटन गरेको थियो । नेपाली भूमी मिचेर चीनको सीमा मानसरोवर जोड्ने सडक निर्माण गरेको विरोधमा अनेरास्ववियू विराटनगरले आज प्रधानमन्त्री मोदीको पुत्ला दहन गरेको हो ।

अनेरास्ववियू सम्वद्ध युवाहरुले विराटनगरको रोडशेष चोकमा मोदीको २ वटा पुत्ला जलाएका हुन् । उनीहरुले नेपाली भुमि फिर्ता गर, लिपुलेक–कालापानी र लिम्पियाधुरा हाम्रो हो, बेईमान छिमेकी चाहिँदैन्, भारतीय दादागिरी मुर्दावाद जस्ता नारा लगाएका थिए । पुत्ला दहनका क्रममा पुगेको प्रहरीहरुले विद्यार्थीहरुले जलाउदै गरेको मोदीको पुत्ला खोसेका थिए । पुत्ला दहन गरेको खोस्नेक्रममा विद्यार्थी र प्रहरीबीच ठेलामठेल समेत भएको थियो ।

भारतले नेपालको लिपुलेक भूमी मिचेर सडक निर्माण गरेसँगै काठमाडौंलगायत विभिन्न जिल्लाहरुमा प्रदर्शन भइरहेको छ । प्रतिपक्षसँगै सत्तापक्षकै सांसद तथा नेताहरुले पनि संसदमा भारतको उक्त मिचाह कदमको विरोध जनाउँदै आएका छन् । नेपाल–भारत सीमा विवादको विषय अन्तराष्ट्रिय अदालतमा लैजानुपर्ने उनीहरुको भनाइ छ । तस्वीरहरु पुष्पराज थपलिया