पूर्वाञ्चल खबर
विराटनगर–२ स्थित शंकरपुरमा जारी विराट एक्स्पोमा नगद छुटदेखि विभिन्न उपहारका अफरहरू ल्याइएका छन् । एक्स्पोमा उपभोक्तालाई आकर्षण गर्न विक्रेताहरूले नगददेखि विभिन्न उपहारको व्यवस्था गरेको बताइएको छ । एक्स्पोमा ग्याँस चुल्हो, किचन तथा ठूला होटल र पार्टी प्यालेसले प्रयोग गर्ने वस्तुहरुमा पनि प्याकेजअनुसार अफर दिएको छ ।
एक्स्पोमा लत्ताकपडाका साथै दैनिक उपभोग्य वस्तुमा पनि विभिन्न अफर र छुटको व्यवस्था गरिएको छ । मेलामा वस्तुअनुसार ५० प्रतिशतसम्म छुटमा विक्री गरिएको छ । एक्स्पोमा नेपाली उद्योगी तथा व्यापारीले मात्रै नभई विदेशबाट आएका व्यापारीलेसमेत अफर लिएर आएका छन् । उनीहरुले हरेक वस्तुको खरिदमा १५ देखि ३० प्रतिशतसम्म छुट दिएका छन् ।
एक्स्पोको आइतबार २० हजार बढीले अवलोकन गर्नुका साथै ३ करोड बढीको कारोबार भएको प्रचारप्रसार संयोजक नन्दु राठीले बताए । बालबालिकाका लागि विभिन्न मनोरञ्जन रोटे पिङ, मौतका कुवाका साथ साँगीतिक कार्यक्रम गरिएको छ । दैनिक स्थानीय र राष्ट्रिय कलाकारले मनोरञ्जन दिएका छन् भने सोमबारको विशेष प्रस्तुति एक्सिस व्याण्डको रहने राठीले जानकारी दिए ।
