सुन तस्करीमा निलम्बित एसएसपी खत्री पुर्पक्षका लागि कारागार चलान

खबर पूर्वाञ्चल, १७ जेष्ठ २०७५, बिहीबार १९:२६

बिराटनगर / करिब ३८ क्वीन्टल सुन तस्करी तथा सनम शाक्य हत्या प्रकरणमा प्रमुख अभियुक्त नेपाल प्रहरीका निलम्बित एसएसपी श्याम खत्री पुर्पक्षका लागि कारागार चलान भएका छन् । मोरङ जिल्ला अदालतले आज खत्रीलाई पुर्पक्षका लागि कारागारमा राख्न आदेश दिएको हो

अन्तराष्ट्रिय प्रहरी संगठन (इन्टरपोल)मा डिफ्यूजन नोटिस समेत जारी भए पछी खत्रीले आज विहान जिल्ला अदालत मोरङमा आत्मसमर्पण गरेका थिए ।

विहान १० बजे अदालतमा हाजिर भएका खत्रीको ३ बजेसम्म बयान लिइएको थियो । उनले १२ पेजको बयान दिएको जिल्ला अदालत मोरङका निमित्त श्रेस्तेदार केदारप्रसाद गौतमले जानकारी दिए । खत्रीको बयानपछि थुनछेक बहस भएको थियो ।

खत्रीलाई संगठित अपराध निवारण ऐन २०७० को दफा ४१ तथा मुलुकी ऐन अ.ब. ११८ को देहाय २ का आधारमा पुर्पक्षका लागि सिधा खान पाउने गरी थुनामा राख्न आदेश दिएको अदालतका निमित्त श्रेष्तेदार गौतमले जानकारी दिए ।

मुद्दामा बादी नेपाल सरकारको पक्षबाट मुख्य न्यायधिवक्ता पुन्यप्रसाद पाठक र खत्रीको तर्फबाट अधिवक्ता हेमराज पन्तले बहस गरेका थिए । थुनछेक बहसपछि अदालतका ६ नम्बर इजलासका न्यायधिस नारायणप्रसाद शर्माको इजलासले खत्रीलाई पुर्पक्षका लागि कारागार चलान गर्ने आदेश दिएको हो ।

विमानस्थलमा रहँदादेखि गारेसँग खत्रीले एक किलो सुन पास गराउँदा ५० हजार रुपैयाँ लिने गरेको गोरेको बयान उल्लेख रहेको छ । गोरेका अनुसार विमानस्थलबाट खत्रीले करिब ५ सय केजी सुन पास गराएको र त्यसवापत २ करोड रुपैयाँ लिएका थिए । सुन तस्करीको अनुसन्धान गरिरहेको गृहमन्त्रालयको छानविन समितिले तस्करमिा नाम मुछिएपछि बयानको लागि बोलाउँदा खत्री फरार भएका थिए ।

सुन तस्करीमा सनमको हत्या भएपछि बयानको लागि बेलाउँदा आफू कार्यरत प्रहरी प्रधान कार्यालयबाट १० दिनको विदा स्वीकृत गराएर भारत गएका खत्री आज काठमाडौं हुँदै जिल्ला अदालत मोरङमा हाजिर भएका थिए । खत्रीले बयानमा सुन नै बरामद नभएको अवस्थामा कसैलाई तस्कर भन्न नमिल्ने जिकिर गरेका छन् । उनले त्रिभुवन विमानस्थलबाट हुने सुन तस्करीमा तत्कालीन प्रहरी नायव महानिरीक्षक (डिआईजी) गोविन्द निरौलाको संलग्नता रहेको पनि बयानमा उल्लेख गरेका छन् ।

खत्री तिनै प्रहरी अधिकारी हुन्, जो यसअघि दुबईबाट आएको ३४ किलो सुन काण्डमा पक्राउ परेका थिए । तर, उनलाई पछि अदालतले सफाई दिएको थियो ।
पूर्व डीआईजी गोविन्द निरौलासँगै एसपी खत्री र एसपी विकासराज खनाल ०७२ ०७३ मा विमानस्थल प्रहरीमा थिए । त्यसबेला नै गोरेले तस्करीको सेटिङ मिलाएको देखिएको ।

तपाईको प्रतिक्रिया

खबर पुर्वान्चल

खबर पूर्वाञ्चल मिडिया प्रालीद्वारा सञ्चालीत खबर पूर्वाञ्चल डट कम
सञ्चालक तथा प्रवन्धक निर्देशक – पुष्पराज थपलिया
सम्पर्क नं. ९८५२०२९८२२, ९८०७०६१९९२
Email: pushpa.biratnagar@gmail.com
सम्पादक – रमेश अधिकारी
सुचना तथा प्रसारण विभाग दर्ता नं. ०७५७/०७४/७५