पूर्वाञ्चल खबर
नेपाल प्रहरीले सार्वजनिक गरेको पछिल्लो विवरणअनुसार बाढीपछि बेपत्ता हुनेको संख्या अझै ४ हजार ७९८ रहेको छ ।
प्रहरीका अनुसार फेला परेका शवमध्ये ४२७ पुरुष, २५० महिला, ३४ बालक र ४५ बालिका छन् । त्यसबाहेक ५३२ वटा मानव शरीरका आंशिक अंगसमेत फेला परेका छन् । अस्पतालमा उपचारका क्रममा थप २ जनाको मृत्यु भएको प्रहरीले जनाएको छ ।
फेला परेका १ हजार २९० शवमध्ये ९२६ वटाको व्यवस्थापन भइसकेको छ । १ हजार १४१ जना मृतकको अझै पहिचान खुल्न सकेको छैन ।
बाढीमा परी बेपत्ता भएकामध्ये २ हजार ८४७ जना नेपाली र ६०१ जना विदेशी नागरिक रहेको प्रहरीको विवरणमा उल्लेख छ । त्यस्तै, १ हजार ३५० जनाका सम्बन्धमा फोनमार्फत जानकारी प्राप्त भएको जनाइएको छ ।
विपद्पछि सुरक्षाकर्मीको सक्रियतामा हालसम्म ८ हजार १२७ जनाको उद्धार गरिएको छ । उद्धार गरिएकामध्ये ६ हजार ९० पुरुष र २ हजार ४७२ महिला रहेका छन् ।
मृतकको पहिचानका लागि प्रहरीले डीएनए नमुना संकलनको कामलाई समेत अघि बढाएको छ । हालसम्म मृतकका १ हजार १४३ र आफन्तका ७१९ गरी कुल १ हजार ८६२ वटा डीएनए नमुना संकलन गरिएको प्रहरीले जनाएको छ ।
पहिचान हुन बाँकी शवको विवरण प्रहरीले आफ्नो वेबसाइटमा समेत सार्वजनिक गरेको छ । खोज तथा उद्धारसँगै मृतकको पहिचान र बेपत्ताको अवस्था पत्ता लगाउने काम जारी रहेको प्रहरीले जनाएको छ ।
