पूर्वाञ्चल खबर
२०७२ साल बुद्ध जयन्तीको अवसरमा विराटनगरबाट पुष्पराज थपलिया, हरि अधिकारी र अनिल श्रेष्ठले सुरु गरेको खबर पूर्वाञ्चलको यात्रा आज ११ वर्ष पूरा भएको छ । त्यो बेला डिजिटल पत्रकारिता भर्खरै फस्टाउँदै थियो । छापा पत्रिकाको वर्चस्व रहेको समयमा अनलाइन माध्यमबाट पूर्वाञ्चलका आवाजलाई देश–विदेशसम्म पुर्याउने जुन सपना तपाईंहरूले देख्नुभयो, आज त्यो सपना यथार्थमा परिणत भएको छ ।
सुरुवाती दिनहरू पक्कै सहज थिएनन । सीमित स्रोत–साधन, प्राविधिक जनशक्ति अभाव, पाठकको विश्वास जित्ने चुनौती, र आर्थिक स्थायित्वको संघर्ष । तर यी सबै बाधा–अड्चनलाई चिर्दै खबर पूर्वाञ्चलले आफूलाई एक भरपर्दो, निष्पक्ष र जनमुखी डिजिटल मिडियाको रुपमा स्थापित गरेको छ ।
खबर पूर्वाञ्चलले यसअवधि भित्रमा समाचार सम्प्रेषण मात्र गरेको छैन । कोशी प्रदेशका कुना–काप्चामा दबिएका आवाजलाई उजागर गरेको छ । शिक्षा र स्वास्थ्यका सवालहरु, किसानका समस्या, मजदुरका पीडा, युवाका सपना, महिला हिंसाका घटना, विकास निर्माणका अनियमितता, र सुशासनका मुद्दालाई प्राथमिकताका साथ उठाएको छ ।
कोशी प्रदेशको खेलकुद, शिक्षा र स्वास्थ्यको अवस्थादेखि प्रदेश सरकार होस् वा प्रदेश सभाका गतिविधि । स्थानीय तहको बजेट दुरुपयोग, व्यापारिक मुद्दामा हामी सँधै अग्रपंक्तिमा छौं । कोभिड–१९ महामारीको कठिन समयमा पनि खबर पूर्वाञ्चलले खेलेको भूमिका अविस्मरणीय छ ।
आजको युग सूचना प्रविधिको युग हो । पाठकको हात–हातमा मोबाइल पुगेको छ । यस्तो अवस्थामा छिटो, छरितो र विश्वसनीय समाचार दिनु ठूलो चुनौती हो । खबर पूर्वाञ्चलले यो चुनौतीलाई अवसरमा बदल्यो ।
सामाजिक सञ्जालको प्रभावकारी प्रयोगदेखि मोबाइल–फ्रेन्ड्ली वेबसाइट – हरेक क्षेत्रमा तपाईंहरूले आफूलाई अपडेट राख्नुभयो । यो नै ११ वर्षको मिहिनेतको प्रमाण हो।
पाठकको विश्वास जित्नु नै मिडियाको सबैभन्दा ठूलो सम्पत्ति हो। क्लिकबेट हेडलाइन र सनसनीपूर्ण समाचारको होडबाजीमा नलागी तथ्यमा आधारित, सन्तुलित र मर्यादित पत्रकारितामा हामी छौं ।
गौरवमय १० वर्ष विताएको खवर पूर्वाञ्चलसहित देशभर सञ्चालित अनलाईन तथा निजी सञ्चार माध्यमहरुलाई सरकारको गतिविधिले संकुचित पार्ने कार्य भईरहेको हामीले अनुभूती गरेका छौं । गत चैत १८ गते प्रधानमन्त्री तथा मन्त्रिपरिषद् कार्यालयको परिपत्रले अहिले निजी सञ्चार माध्यम प्रभावित भएका छन् । सरकारी विज्ञापन सरकारी सञ्चारमाध्यमलाई मात्रै दिने सरकारको विभेदकारी निर्णयले हामीलाईपनि पक्कै असर गर्ने छ ।
खवर पूर्वाञ्चल अहिलेको अवस्थामा आईपुग्न हाम्रा समस्त पाठक तथा विज्ञापनदाता र शुभेच्छुकहरुको अटुट माया हामीले पाएका छौं । यही मायाले आगामी दिनमा थप उचाइ प्राप्त गर्ने छौं । १० वर्षको अनुभवपछि अब खबर पूर्वाञ्चल ‘किशोरावस्था’ पार गरेर ‘युवा अवस्था’मा प्रवेश गरेको छ। अबको यात्रा अझ परिपक्व र जिम्मेवार रहने पनि यहाँहरुलाई विश्वास दिलाउन चाहन्छौं ।
अन्त्यमा, खबर पूर्वाञ्चलका संस्थापक, सम्पादक, समाचारदाता, प्राविधिक टिम सहित सम्पूर्ण परिवारलाई पुन : ११ औं वार्षिकोत्सवको हार्दिक मंगलमय शुभकामना । जय खबर पूर्वाञ्चल
